RUAHCHANNAK IN DAMNAK HNGAKTU HNA

Mi kip nih hngak hlangmi thil kan ngei cio. Kan hngak hlangmi tu cu aa dang cio. Kan ngakchiat lioah kan pa le lo an tlun lai kan i ngaih ngai. Cu sianginn kaimi nih kharpi lai kan i hngahhlang tuk. Cu bantukin damlonak a ngeimi nih damte in hung um than i hngakhlang tuk a si. Cun thong tla zong nih thonginn chuah lai i ngaih a si. Cucaah hngakhlangmi i ngaihnak lungthin hi Mirum le sifah aa dang lo. Hngak hlangmi thil a um cio i thinlung kan pek ning zong aa khat ko.

Cu bantukin tulio kan vawlei mi vialte nih kan hngahhlang bikmi cu covid-19 zawtnak hi zeitik ah dah a dih khawh te hnga ti hi a si. A bik in tulio te hi kawl ram cu lockdown tuah lio a si caah covid-19 zawtnak a dih lai a hngakhlang khunmi kan si. Asinain kan thil hngakmi hi voikhat khat ah a phan dih bal lo. Cu tik ah kan hngak a rauh deuh le kan lung a dong tawn. Cu lungdonghnak nih cun harnak nganpi a kan phanhpi tawn. Lungdongh hmangmi nih harnak hi kan tawng khun tawn.

Cucaah harnak kan timi vialte hna hi kan hngak hlangmi thil hna chung in a chuakmi a tam. Cucu vawlei kan nunnak ah kan subject ngan bikmi pakhat a si. Kan hngak hlangmi thil hi zeitindah tlam a tlin khawh hnga ti hi kan khuaruahnak ah a laicer a si. Cu bantukin covid-19 zawtnak hi zeitik caan ah dah a dih te hnga ti hi vawlei mi vialte nih lungkhat tein kan hngahhlangmi cu a si. Sihmanhsehlaw hi zawtnak hi tuan ah a dih khawh ti lo caah cheukhat caah cun Bawipa a caan a sau tuk ko cang. Kan theithiam kho lo ti a fawi cang.

Thil pakhat hngak timi hi a har ngaimi thil a si. Tu chan ahcun vawlei thiamnak hi a sang tuk cang. Tahchunnak ah kan hman liomi wifi speech hna hi a thawng tuk cang. Cucaah mobile phone tha i put in wifi line hna a that lo ahcun hngak dingah a har tuk in kan ruat cang. Information and technology (IT) chan a si i thawngpang theih hi a ran tuk cang caah thil hi a khur a hnuarmi cu cohlan a har tuk cang. Cucaah covid-19 zawtnak zeitik ah a dih lai timi hngak hi aho paoh kan caah a har tukmi thil a si.

Asinain kan Pathian hi duhsah tein a kalmi Pathian a si. Pathian nih wifi speech thawngngaimi bantukin mi an hruai bal lo. Israel miphun zong kha Ezip in Canaan ram an kal lioah ni tlawmpal kal khawhnak lam asi ko nain kum 40 rauh in a kalpi hna. Vawlei ralpi pahnih lioah Japanese pawl cu rang tuk in an rak thangcho. Asinain vawlei ralpi ruangah an khuapi hna cu vutcam ah cang. Cucaah Japan theologian pakhat Kosuke Koyama nih “kan Pathian cu nazi pakhat ah mengthum a kalmi Pathian a si” a rak ti. Cucaah Pathian lamhruainak cu a har kan timi thil hi mah duh caan ah kaltak khawh a si lo.

Nihin ah kanmah le inn ciote in covid-19 zawtnak a dih lai a hngak ciomi kan si. Cheukhat cu damlonak a ngei bu te he kan hngak. Cun cheukhat cu ngeih ciami thazang nih a thei deuh caah tuan deuh ah an dam. Cun cheukhat cu zawtnak nih a tlunh lo nain lockdown a si caah inn i kharkhup in kan hngak. Asinain kan zapi in hi zawtnak a dih lai kan ngah cio. Aho hmanh leng a chuah tuan kho hleimi kan um lo.

Hi lio caan ah kan herh bikmi cu kanmah le kan umnak cio in kan minung sinak men in hngak si loin Pathian thilti khawh tawnnak bochan in kan hngak ding a si. A ruang cu nihin kan tonmi thil hi a sawhsawh a si lai lo. Bawipa nih aa tinhmi a um ko. Zeicahtiah kan vawlei hi a sual tuk cang. Thatlonak phun a tam tuk cang. Kan nun can tawite caah le kan paw cawmnak caah Pathian kan kaltak can hi a tam tuk cang. Cucaah vawlei system thlen in le nun tawnning phung linglet in chitkhat te cu keimah ka au ta hna she ti a duhnak a si kho. Cucaah hi can lio hi chungkhar i sersiam can, peng le tlang i sersiam can le vawlei thiamnak nih a tei lomi zawtnak hi Pathian Bia in tei can a si.

Pathian lianngannak le sunpernak aa phuan lainak can hi a can ahcun hngak a har tuk tawn. Abraham nupi zong kha a lungdongh khawh in fapa a hrin. Peter zong kha a lungdongh khawh in Jesuh bia in nga tampi a tlai. Sihmanhsehlaw Bawipa nih Amah hgnaktu pawl an aunak cu a theihpiak hna (Sam 40:1). Cun “Bawipa cu Amah aa bochan mi vialte cungah a tha. Cucaah a kan khamhnak ding cu lungsau in kan hngah awk a si” (Tahnak hla 3:25-26) a ti. Thil hi lungsau tein Bawipa bochan in kan hngak ahcun Pathian thilti khawh thawnnak pumpak kan cung cio ah aa lang hrim ko lai.