BAWIPA KHA I RUAHCHAN KO

Ruanchannak timi hi kan hmailei kong kha a tha lei in kan i ruahchanmi a si. Minung khuaruahnak a tuaktan khotu (Psychologist) pawl nihcun “ruanchannak nih minung cungah thatnak tampi a pek khawh. Zawtnak tiang a damter khawh i thil thalo tuahnak nunzia kan ngeihmi hna zong i sum khawhnak thawnnak thazang a ngeiter an ti. Martin Luther zong nih “minung nih kan thilti khawhnak vialte hi ruahchannak he aa zulh dih” a ti.

Bible nih cun ruahchannak hi zumhnak he a kalti ti in a chim. Korin 13:13 ahcun “a hmun zungzalmi thil pathum a um, cu hna cu zumhnak, ruahchannak le dawtnak an si” a ti. Titus chung ahcun “Pathian sal le Khrih Jesuh sal ka sinak a langhtertu cu zumhnak le hngalhnak le ruahchannak an si” (Titus 1:2) tiah a ti. Cucaah Bible nih ruahchannak a timi aa hngatchannak cu Pathian ah khan a si. Spurgeon zong nih “Jesuh telloin ruahchannak hi a um kho lo” a ti ve.

Cucaah CH Lewis nih “Khrihfa pawl ruahchannak hi lungdonghnak in a rami siloin a taktak in kan hmuhmi le kan tonmi nih a hrinmi a si” tiin a rak chim. Hi kong ah Pawl zong nih ruahchannak hi khamhnak hrampi a si tiin a chim. Cucaah “mit in kan hmuh lomi kha kan i ruahchan ahcun cucu lungsau in kan hngahnak a si” (Rom 8:25) a ti.

Cucaah Sam 42:5 a tialtu pa nihcun “zeicahdah ka ngaih a chiat? Zeicahdah ka lungre a theih? Pathian cu ka bochan than lai i ka khamhtu le ka Pathian cu ka thangthat than lai” tiah amah le amah kha thazang aa rak i pe.

Nihin kan ram nih a tonmi thil hi minung sinak lei in cun tur a har ko. Khailei in kan ram buainak a si. Khat lei in zawtnak thalo nih a kan tlunh fawn. Ahohmanh a kan bomchan khotu an um fawn lo. Kan ngandamnak nih a ngeihchunmi thazang zat te kan i bochanmi cu a si ko. Cucaah mah le mah aa bomchan kho deuhmi nih an inturnak kha aa ning deuh i a mah le mah thazang pek kho loin lung a dongmi nih an nunnak tiang thinphang a si.

Asinain zumtu nih kan lung a dongh lonak le kan i ruahchannak hrampi cu Pathian hi a si. Amah cu harnak kan ton can ah kan himnak le kan lungpi a si. Sam catialtu pa nih a chim bantukin kanmah ciote nih, zeicahdah ka ngeih a chiat? zeicahdah ka lungre a theih? Pathian cu ka bochan than lai tiah lung i thlek in i sersiam kan herh lio cante a si. Thazang thawnter kan herh lio cante a si.

Pathian cu kan caah thiltha tuahtu a si. Kan mah caah nunnak thap in aa pum pemi a si. Tho usi law kan Pathian cu au hna usi. Kan Pathian cu Amah aa ruahchanmi cungah a thilti khawhnak thawnnak a ngeimi a si.