JESUH LAWNG KAN HNANGAMNAK A SI

Mi pakhat nih a chim ka rak theih balmi cu, voikhat cu phungki pakhat vanram a phan an ti. Vanmi pakhat nih a dawng i zeidah kan tuahpiak lai a ti. Phungki pa nih cun vawlei ka um lioah harnak le sifaknak lawngte ka ton. Cucaah hika hmun ahcun nuamte in um ka duh cang. Nupi dawhte ngeih in, inn thapi ah duhmi paoh eidin in nuamte in nun ka duh cang a ti. Cu tik ah vanmi nih cun a duhmi thil vialte cu a tuahpiak i nuamte in a um an ti.

Asinain kum zei maw zat a rauh ah phungki pa nih vanmi sinah hiti hin a chim than. Rumnak le lianngannak he duh paoh in nun hi ka ning tuk cang. Vawlei ka um lioah har bu tein ka nun tawn kha ka ngai than. Cucaah hi nakin a niam deuhmi sinak ah ka chia than ko a ti. Vanmi nih cun kan tuahpiak kho ti lai lo a ti. Cu tikah phungki pa nih cuti a si ahcun ka caah cun van nuamhnak si loin hremhmun pei a si ko cu a ti. Cu tikah vanmi nih cun ka pu tu hi khuaika hmun ah dah ka um tiah na ruat a ti.

Minung hi zei bantuk thilti khawhnak ngeih le dirhmun that zongah, cu hna nih cun lungdaihnak le hnangamnak taktak a pe kho lo. Cu chinchap ah harnak le buainak kan tawng i hnabei dongin kan um chin ahcun, kanmah kha hawi nakin van duai bik ah kan i ruat tawn.

Cucaah Mahatmanh Kandi bia hi ruat than usi ti ka duh. Amah nihcun "vanchia bik ah na ruat maw? na ruat ahcun nangmah nakin vanchia deuh he i tahchun tuah". Hawi bantukin kedan tha ka ngeilo tiah na ruat maw? Kedan hman hruknak a ngei lomi a ke a um ti lomi minung he i tahchun tuah" a ti.

Vawlei thil sining ah hin, muihnak nih ceunak a that ning a langhter tawn i khuasik nih hin khualum a nuamh ning a langhter. Ni linh le rocar nih hin ruahsur a that ning a langhter. Cu bantukin harnak le buainak kan ton a fah ning nih hin damte le lung daite in kan rak nun tawn a nuamh ning le a that ning a langter. Cucaah mithiang Paul zong nih khan harnak tete a tawn tikah a caah chiatnak si loin thatnak lei in a cohlan zia a rak thiam tawn.

Cu bantukin kan nun lamthluan cio ah hin harnak tete kan ton cio ko lai. Cu bantuk can kan ton tikah kan tonmi thil lawng kha kan chim ahcun sehtan a lawmhnak tu a si. Bible zong nih "nan chimmi ningin teipar nan zun lai" a ti. Cucaah kan harnak kong lawng kha chim si loin, kan harnak lak ah Pathian thatnak tu kha zoh thiam kan herh tawm. Pathian tu kha bochan le a sinah lawmhnak bia chim deuhnak nih hin thinlung ram a damter.

Minung hi vawlei ah kan hlawh a tlin chung cu hnangam tein kan um tawn i asinain hlawhtlin zungzal hi a har. Cu tikah lungrethei in kan um tawn. Asinain Jesuh nih pekmi hnangamnak cu zungzal caah a si. Sam tialtu pa nihcun " nangmah nih lawmhnak na ka pekmi cu, din awk zu tampi a ngeimi le ei awk rawl tampi a ngeimi hna an i lawmhnak in a ngan deuh. Hnangam tein ka it lai i ka hngilh fawn lai, Bawipa nangmah lawng lawng nih him tein na ka umter" a ti (Sam 4:7-8).

AD 18 lioah mirang ram ah hlaphuah thiam pakhat nih biazai bantukin a rak phunh. "Pathian nih vawlei le a chung ummi vialte a ser lioah hin minung sinah zei paoh a pek ko nain a pek lomi pakhat cu hnangamnak le daihnak hi a si. Zeiruangah tiah hnangamnak le daihnak a pek chih hna ahcun Amah Pathian kha an herh ti lai lo i Amah sin zong ah kir duhnak lungthin an ngei ti lai lo" a ti. Hi pa nih a chim duhmi cu hnangamnak le daihnak taktak cu Bawipa lawng nih a ngeih ti hi a si. Cu Bawipa nih a ngeihmi hnangamnak lawng nih vawlei harnak a tei kho.

Zeiruangah Daniel kha chiandeih lak ah hlawt ding kha a thin a phan lo ti ahcun Bawipa nih hnangamnak le daihnak in a umpi caah a si. Cucaah hnangamnak cu harnak le buainak a um lo caah si loin Pathian umnak hmun ( present of God) tu hi a si. Pawl cu a bia chim fiang dingin Rom ah a kal. Cu lioah an lawng kha thli nih a hranh nain hnangam tein a um. Cucaah lawng chung a umtimi hna kha "hnangam tein um ko u, lawng cu a rawk ko lai nain minung cu kan him lai. A ruang cu keimah hi Pathian umpi mi ka si" a ti hna.

Cucaah hnangamnak hi a chim in chim cun fian khawh a si lo. Kan nunnak ah Paul le Daniel bantukin Pathian a um a herh. Vawlei ah hnangamnak phunphun a um ko. Cheukhat nih vawlei buainak le ralnak, ramkhat le khat dohnak um lonak hi hnangamnak hmun a si an ti. Phun dangin chim ahcun mi nih harnak an kan pek lonak hmun kha hnangamnak kan ti. Asinain Jesuh nih cun "keimah nih kan pekmi hna cu vawlei nih an pekmi hna hnangamnak bantuk a lo" (John 14:2) a ti.

Cucaah Jesuh nih a chimmi hnangamnak a timi cu buainak le ralnak aum lo ca men ah a si lo. Harnak le buainak karlak i a ummi hnangamnak hi a si. Amah hnangamnak kha a si. Cucu vawlei nih pek khawhmi a si lo. Vawlei pekmi cu can sau a rau lo. A lo than tawn.

Cu thil cu nihin kan tonmi nih a fianter ko. Inn tha kan ngei, lo tha kan ngei. Hnipuan tha tha kan ngei hna. Kan inn chunglei kan tamhmi a phun a tling. Asinain covid-19 hrik kan sin a phanh hnu cun kan ngeimi thil vialte hna kha kan lunghrinh dih cang. Kan ta cu a si ko nain kan tawng ngam ti lo. Hi nih hin vawlei thil nih hnangamnak tak tak a chuahpi lonak le bochan ding taktak a si lonak a langhter.

Covid-19 hrik cu vawlei fimnak nih a tei lo. Dam lo zohkhenhnak ca i an sermi seh phun phun le sii phun vialte nih covid hrik hmai ah cun sullam an ngei kho lo. Cu hna nih hnangamnak an kan pe kho lo. Hi zawtnak hrial khawh dingah cun "nan kut thiangte in i tawl u" ti lawng a si. Hmailei ah zei thil dah can rih lai kan thei kho lo. Kan vawlei hi bochan ngam ngai a si lonak a langhter ko.

Cucaah kan herhmi cu Jesuh lawng hi a si. Jesuh he cun zei thil paoh kan ton zongah hnangamnak a um. Amah min in zei thil kan tuah ah hlawhtlinnak a um i damnak a um. Jesuh lawng kan hnangmnak a si.

Like

Comment