NA PATHIAN TON DINGIN I TINH TUAH

Hi kong hi Amos 4:12 ah kan hmuhmi a si. Amos chan hi BC 642-640 ah a si. Jereboam 2nak siangpahrang a tuan lio a si. Jereboam cu mi thawng ngai a si caah a pongkam ram 8 a tei hna i a ram a kauter ngai.  Asinain cu ram dang nih an biakmi Pathian kha a biakpi ve hna. Cun ramkelnak leiah hin biaknak kha a kuttang ah a chiah. 

Cucaah tlangbawi hna nih amah nawl loin zei rian hman an tuah ngam lo. Cucaah biaknak lei daithlan in a um lio a si. Cu lengah biaceih bawi hna zong nih dinnak le felnak in bia an ceih lo. Chawlet hna zong nih cuai deu an rak hman. Cun nupa sualnak a rak tam taktak. Nu pakhat kha pa le fa an i hrawm ti a rak si. Cahlun chan ahcun sifak le ngaktah hna kha uktu bawi nih thate in zohkhenh dingin Pathian nih tuanvo a rak pekmi hna an si. Asinain thate in sifak pawl kha zohkhen loin anmah tu kha hmuhnak lei tuaktannak tu ah an rak hman hna. Anmah tu cu vui ho in tamhmi khuasik inn le thal inn an rak ngei.

Cu tiah Amos kha Pathian nih Israel mi pawl chimhrin dingin a rak fial nain Israel miphun pawl nih a bia an rak ngai duh lo. Cu tikah Pathian nih harnak phun 7 ka inter hna lai. A muimi harnak in ka len hna lai a rak ti. Cucaah Amos nih Israel miphun pawl cu “Nan Pathian ton dingin i timh u” (Amos 4:12) a ti hna. 

Zei ruangah “Nan Pathian ton dingin i timh u” a ti hna? Minung nih Pathian fa sinak (experience) loin Pathian cu ton khawh a si lo. Pathian fa sinak (experience) cu vancung ram ah kan title, (our title of heaven) a si. Kan thil tuah thatnak ruangah a si lo. Pathian cohlanmi sinak nun kan ngeihnak in a si lai. Cun minung hi that kan duh ko, asinain kan tha kho taktak lo. Din le fel kan duh ko asinain kan ding kan fel kho taktak lo. Peng le tlang in miphun in ram in sual hi doh a si ko. Asinain sualnak tuah cu a dong kho taktak lo. A ruang cu Pathian fa sinak experience lo cun sual hi doh kho taktak a si fawn lo. Cucaah Khrihfa kan si a that hleinak cu sual doh duhnak lungthin kan ngeih hi a si. Sual doh duhnak lungthin lawng siloin sual tei khawhnak thawnnak zong kan ngei fawn. 

Asinain nihin zumtu tampi cu Sual doh duhnak lungthin kan ngei lo. Chin miphun cu Khrihfa kan rak si kaa ah khan Siangbawite nih an rak kan cawnpiak hmasa bikmi cu sual doh hi a si. Zarhpi ni thate in nan urh lai, nu le va thlacampiak loin umti lai lo, nu le va nan i then lai lo, mi he taza nan i cuai lai lo, nan fial lai lo lih bia nan chim lai lo tiah an rak kan cawnpiak. An rak cawnpiak ning in nun khawh an rak i zuam. Nihin ah cu bantuk hna cu minung nun tawn ning phung ah kan ruat cang hna. Aruang cu kan thanchonak nih sual a simi kha sual lo ah a tuah dih cang.

Minung nih Pathian hmai i kan i dawh bik lio can hi zei tik can ah dah a si. Phung kan chim lio a si maw, 1/10 tampi kan pek lio a si maw. Kan ni pumh lio le hla kan remh lio hi a si maw? Rawl kan ulh lio a si maw? Pathian hmai i kan i dawh bik lio caan cu Sual kan doh lio hi a si. Zeicahtiah sual ngaihchih nun hi vanram he aa rupmi/aa thlakmi kan sinak, (our fitness for heaven) a si. Pathian fa ka si tinak men in vanram kan phan lai lo. Pathian fa sinak cu sual ngaihchihnak nun a si. Cu bantuk cu vanram he aa rupmi sinak a ngeitu asi.

Fapa tlau pa kha Pathian hmai i aa dawh bik lio can kha zei can ah dah a si? Hnipuan tha le kedan tha an hrukter lio can kha a si maw?. Pathian hmai aa dawh bik lio can cu sual doh duhnak lungthin a ngeih lio can kha a si. “ka tho lai i ka pa sinaah ka kir than lai, ka pa nangmah hmai le Pathian hmai ah ka sual cang” a ti lio can kha a si. Cu a sual dohnak theipar cu kedan thar le angki tha an hrukter i puai an tuahpiak kha a si.

Kan ram i sual kan doh ning hi a hman lo. Pathian sinah ngaihthiam cu kan hal ko nain kan thil sual tuah kan ngawl lo. Thla kan cam, rawl kan ulh hnu cun zei thil paoh kha tuahnak nawl a ngeimi bantuk ah kan ruat. Cucaah kan thlarau mi sinak hi sual thazang peknak ah kan hman. Pathian nih Thiangthlarau a kan pek cu sual i hngalhnak le dohnak caah a si. Hlim le lampi men dingah a si lo. 

Cheukhat cu Amah kan thangthatnak ahcun sawisel awk um lo kan si. A zangfahnak le velngeihnak kong kan ruat ahcun kan hlimpi, kan lampi. tawn Hlimpi le lampi phun zong a si ko. Asinain Pathian nih sinak a ngei i cu cu dinfelnak le felnak, thianhlim nun hna hi a si. Cuaah Pathian bia hi kan zumh taktak ahcun thianhlimnak lam cu kan zulh ding a si. Pathian cu kan thianhlimnak a si ti men in a za lo. Thiannak kan tanh ve a hau. Jesuh cu kan felnak a si ti lawngin a za lo. Felnak kan tanh ve a hau. Thianhlimnak in a thianghlimmi khuapi ah kan lut lai. Vancung ram cu thianhlim loin um khawh a si lo caah Lusifer le a hawi le zong vancung ram in thawl an rak si. Evi le Adam zong kha Eden dum in Pathian a dinnak le a felnak in thawl an rak si. Cucaah Paul nih “Pathian nih sualnak tuah lengmang dingin a kan ser lo, mithiang si ding in a kan ser” (I The 4:7-8)” a ti. 

Pathian nih a mithiang hna umnak ah vawlei thar le vanthar a ser (Bia 21:3). “Asinain mi rawi hmang, Fih awk lunghtin a ngeimi, lainawng, lihchim pawl vialte hna an umnak ding cu a si lo. (Bia 21:8) a ti. Zeicahtiah kan va um te lainak ram cu a thiangmi ram a si.  Number 6:1-4 “Bawipa sin in thleidan awk tuah dingmi a um. Zu le zu reu an tawng lai lo. Bawipa sinin thleidan caan a tlin hlan chung cu an thianglai"a ti. Cu ram cu “ka ta a si khawh nakhnga ka zuam” tiah Paul zong nih a ti (Fili 3:12-13). 

Kan Pathian he hin ni khatkhat cu hmaiton in kan i tawngte lai. A fa kan si kan si ruangah maw asiloin a ral kan si ruangah maw? Aho hmanh a luatmi kan um lai lo. Cu tikah kan kong kan chim cio te lai. Pathian cu hrial khawh a si lai lo. Jonah kha Pathian hi zaamtak khawh a si rua tiah a rak ruah sual. Asinain rangtuk in thlichia le tilet in a dawi. Kan ton tikah kan Pathian hi a duh fak tuk te lai. A ruang cu kan caah a rak i pekchannak le a inturnak hi a fak tuk ve cang. Heb 12:14 chungah “midang he rem i zuam u law nunnak thiang in nun i zuam u, zeicahtiah nunnak thiang ngeih loin aho hmanh nih Pathian cu an hmu kho lai lo” a ti. “Na Pathian ton dingin i timh tuah (Amos 4:12).