BAWI JESUH THAWHTHANNAK

Vawlei cungah biaknak tampi a um. Khrihfa biaknak he aa dannak cu Jesuh thihnak le thawhthannak hi a si. 

Jesuh kong hi cahlun ah tampi chimchung bia kan hmu. Cathar ah cu chimchung bia cu a tling dih. A chuah lainak, a riantuan lainak, a thih lainak le thawhthan lainak, van kainak le a ratthan lainak, bia a ceih lainak tiangin an rak chimchungmi kha a tling dih. Hi bantukin chimchung bia a rak tlingmi hi vawlei cung biaknak dang hna ah a um bal lo. Cathar ah 80 hrawng Jesuh kong chimchung bia a rak tlinnak kan hmu. Cu hna lakah thihnak in thawhthannak kong chimchung bia a tlinnak le thil sining hi chim ka duhmi a si.

Bawi Jesuh hi tlaih an rak duhnak a sau ngai cang. Zei ruangah tiah Jesuh nih a rak chimphuanmi Pathian kong le Judah upa pawl nih an rak kalpimi Pathian phung hi a rak dang tuk hringhran. Cucaah kan biaknak a hrawh dih sual lai ti an phan tuk hringhran. Asinain Amah lei tangmi an tam lai ti an zumh caah mibu lakah an tlai ngam lo. An vanthatnak ah Judah Iscariot nih a rak awiphir kha an caah vanthat taktak a si. Kheng chung sa bantukin Judah upa pawl kut ah a pek hna. Culio cu lanhtak puai a si caah Jeruslem khua chung cu khual lawngte an rak si.  

A taktak ahcun Jesuh thih hi sehtan nih a duh. Rom ralkap zong nih an duh. Judah mipi hna zong nih an duhmi a si. Jesuh tuanbia hrim hi vawlei in hlawt an duh. Cucaah an tlaih i vailam ah an thahnak hi a si. Bawi Jesuh an thah khawh cu Rom ralkap an i lawm, Farasi pawl an i lawm, Judah upa pawl an i lawm. Asinain a zultu pawl cu an ngaih a chia. An caah hnemtu le hngangamtertu an ngei lo. Cucaah innkhan chungah an i thup. Cu bantukin Judah upa pawl le Rom ralkap pawl hna zong Bawi Jesuh ruak an vui hnu zong in an lung a dai kho ve lo. A ruang cu Bawi Jesuh nih ka thothan lai tiah a rak chimchung caah a si. A thawhthan lai hi an duh hrim lo. Cucaah thlan vengtu double in an chiah hna. Ralkap le temple ralkap nih an ven. Lung nganpi in a thlan kha a khar. Aho hmanh fial kho lo dingin thlan cu an cawngh.

Asinain sabath ni thaizing zingkate ah li fakpi in a hnin. Cu lioah thlan vengtu ralkap pawl cu an tlu i anmah le mah an i hngal lo, a thimi bantukin an um. Cu lioah Bawi Jesuh cu thihnak in a thothan. Thlan an veng kho lo. Ven ci zong a si lo. Cu hnu tlawmpal ah Mery makdlin le a hawile thlan ven dingah an kal. Thlan ah Bawi Jesuh a um ti lo. Khuaruahhar le thinphan ngaiin an um lioah vanmi hna nih "a chim bangin a thothan cang, nan thinphang hlah u an ti hna". Cu tikah an lung a pem i ralthate le thanuam ngai in zultu pawl chim dingah an kal.

Sabath ni thaizing cu a si i riantuan hram an thawk cio lai. Cu lioah ruah lopi in Jesuh a thothan timi thawng a lai. Thlan cawng pawl nih Jesuh thlan chungah a umti lonak kong cu nawlngeitu pawl khualrang in an chim ve hna. Upa hna nih a thothan nan ti lai lo, mi nih an fial nan ti lai tiah lihbia chim an fial ve hna. Cucaah Jeruslem khua cu Jesuh a thothan timi le a thothan lo timi kong lawngte an i cheih lai. Asinain a thothan ko timi hna cu vanmi nih an chimh hna caah tehte an ngei. A thothan lo timi hna cu tehte an ngei lo. Tehte an ngeih lo caah cu kong an chim tikah an mithmai zongin aa thei lai.  

Cozah nih an thupter hna zongah thup khawh a si lo. A ruang cu Jesuh hi a thothan taktak ko timi tehte vanmi hna hmurka in siseh, Bawi Jesuh nih zultu hna sinah a langhnak in siseh an hmuhmi le a theihmi a si caah, cu nih cun ralthatnak a pek hna. Cucaah thih ngamh in an chim ngam. An nunnak i an hmuh theihmi (experience) a si caah an chim rel tikah an mithmai hrim in a lang. Raltha tein an rak tanh caah nihin tiang thawhthan kan tuah khawhnak hi a si. Cu hlahseh law Rom ralkap pawl nih an hloh diam cang hnga.  

Voikhat cu Alfred H. Ackley nih pathian khamhnak kong a chim lioah tlangval pakhat nih na chimmi ka zum lai lo. Na chimmi pa cu mi sual a si caah hlan liopi ah vailamtah ah an thahmi a si a ti. Pastor pa nih a kong ka chimmi Jesuh hi a thi timi tiang lawng na thei. Kaa in kan fianter khawh lo zongah ka thinlung ah a thothan timi hi kaa fiang tuk. Na bia cu kan al kho lai lo, asinain ka thinlung ah a nung ko a ti. Cucaah "A nung” timi hla Khrihfa hla bu No. 142 kha a rak phuahnak a si. Pual nihcun “vailamtah cu a zumlotu hna caah cun hrutnak phung a si” a ti. John 9 ah Bawi Jesuh nih a damtermi mitcaw pa kong kan hmuh. Biaknak lei upa pawl nih aho nih dah an damter, an damter taktak maw? thiah an hal. A ruang cu Jesuh nih a damter timi kha an duh lo. An bia hlami cu thate in a fianter kho hna lo.  Asinain theihmi pakhat a chimmi cu hlan ahcun ka mit a caw atu cu ka dam cang a ti. A dam nakin tehte a piah hna. Cu tikah an al kho lo. 

1.     Thawhthannak nih Pathian fapa sinak a langhter Rom 1:4

2.     Pathian bia a hman taktak timi langtertu a si. LK. 24:7

3.     Zumtu caah thawhthannak hmasa hruaitu a si.

4.     Thiamcanternak langternak a si. misual thiam lo canmi pawl thiam ah canter Rom 4:25.

5.     Teinak langhternak a si. Sual teinak a si. Lamkaltu 2:22

6.     Ruahchannak nung a kan pek Efasa 2: 1peter 1:3 Biathlam. 1:18.

Kan herhmi cu kan nun nih a tep i a nunpimi hi a si. Bawi Jesuh he nun pehtlaihnak ngeih kan herh. A thothanmi nun kan ngeih lo ahcun kan Khrihfa sinak cu sullam a ngei lo. Emus khua lei a kalmi hna kha an kal lioah cun an lam kha a rocarmi lam bantuk a si. A ruang cu Jesuh kong cu an theih nain anmah he a kaltimi pa kha a si ti an hngal lo. Cucaah lungawtawm in can saupi an kal. Mah lam kha a har ngai lai, zeicahtiah lungawtawm lam a si. Cu bantukin a thothan mi Jesuh theifian locun kan vawlei nun lamthluan cu lungawtawm in kalnak lam a si ko lai. Emus khualei a kalmi khualtlawng pahnih kha Jesuh nih Amah a si kha a chimh fian hna hnu lawngah an hngalfiang. Cu kong cu Jeruslem ah chim dingin an kal cawlh than. An kirlei lam cu lam nuam taktak a si cang. An rat lio kha Jesuh a si rak thei hna she law zeitluk in dah lam nuam a si hnga

Bawi Jesuh thawhthannak a hmutu vialte hi an nun aa dang dih. Zultu pawl zong kha Bawi Jesuh a thothan hrimhrim timi mithmuh kuttawngh in an hngalh tikah an minung sining (value system) a dang cang. Peter zong an tlaih lio ahkhan nu hmanh a tih hna. Asinain coverdist filim ahcun Jesuh he an i ton khawh in Bawipa caah keimah ka kal lai a ti cang. Zaam aa tim ti lo. A hnu ah Bawi Jesuh caah sar thih (marta) in a thi. Kan thah lai an ti lioah Bawi Jesuh cu misual kan caah a tungin vailam an tah. Cucaah keitu cu a linglet in ka thali u law ka thah ko u a ti hna. A nun aa dang tuk. Cheukhat cu a konglam men in Bawi Jesuh hi kan hngalh. Mesurman Bible Gumran zongah Jesuh cu sualnak a ngei lo ti cu a um. Profet pakhat zongah an ruat ko. A sinain an zum lo. Ralbawi minthang Napolian zong nih a upat ko. Keimah le Alexander Chilli men te hna nih cun thazaang hmangin ram ka lak, a sinain Jesuh cu dawtnak in ram a lak i aho hmanh nih an kaltak lo a ti. Asinain a zumh le zumh lo cu kan hngalh a si lo. 

Nihin ah kan vawlei hi tihnak le phannak lawngte in a khat.  Sihmanhsehlaw kan nih zumtu hna cu kan khamtu a nung ti kan hngalh. Cu nih cun ralthatnak le ruahchannak a kan pek. Kan hmailei kong zong amah kut ah a um kan hngalh. Kan zumhnak hi Jesuh thlan ah phum in a um tiang lawng hi a si lo. Thawhthannak ngeitu kan si. Kan Bawipa a nun caah kan hmailei a ceu ko.