PATHIAN PENNAK CHUNG NUN

Bible cherhchanh: Mtt. 20:13-16, Mk. 10:15-16

Cheukhat nih khamhnak hi hell tlak lonak le vanram kainak men ah an ruah tawn. Asianin mahnak hi sullam thup deuh a ngeimi a si. Cu bantukin hrinthannak kan timi zong hi a si. 

Khrih ah mithar sinak hi hell tlak lonak men long a si lo. Vawlei kan nunnak caah a si. Pathian nih minung cu amah mui keng in a ser. Cucu Adam le Evi chan ah minung nih a hrawk. Cucaah Pathian ser ningin an um ti lo. Cucaah hrinthan kan timi cu serthan (Regeneration) kha a si.  Adam chan in hrawhmi kha sining kel ah umter than kha a si. Cucu vawlei kan nunnak, nun lio caan caah a si. Nun lio caah a si. Vancung ram umnak ca lawngah serthan kan a si lo.

Pathian nih van le vawlei, a chungummi thil vialte a ser dih hna. Cucu Pathian aa phunnak phunkhat a si.  John 14:8-9 chungah Philip nih “na pa ka hmuhter tuah” a ti. Cu tikah Jesuh nih keimah a ka hmutu cu ka pa zong an hmuh a ti. Cucaah Pathian cu Jesuh in a lang. Jesuh tah aho mui in dah a langh lai?. Nangmah le keimah mui in cu langhter ding a si. Efasa 1:23 “Church is the body of Christ” a ti. Mah cu nangmah le keimah hi kan si. Mtt. 18:21-35 hi Jesuh nih vancung pennak kong he pehtlai in Peter nih bia a halmi a lehnak ah kan hmuh. Peter nih kan unau nih kan cung a sual tik ah voi zeizat dah kan ngaihthiam hna lai a ti. Jesuh nih voi 70 nan ngaihthiam hna lai a ti. Vancung pennak timi cu kanmah sual ngaihchihnak lawng a si lo. Kanmah nih midang sualnak ngeihthiam nun kha a si. Nangmah ah midang nih Pathian an hmuh ding a si. Na minung hawi sinah na ruah ning kha thlen a hau. Cucu hrinthan cu a si.

Vancung pennak timi hi hmunhma a si lo Lk 17:20-21. John 3 chung ah Bawi Jesuh nih John kha “na hrinthan a hau” a ti. Mah kha amah Bawi Jesuh a thi rih lo. Cucaah Jesuh in hrin lainak kong kha a chimmi a si. Cucaah Mithiang Paul nih Rom. 6:1-4 Khrih thihnak chung ah kan thih ve cangnak le a thawhthannak ah thohthanmi kan si cangnak kong a chim. Pathian nih a kan dawtnak tu kha theihtham in amah duh ningin tu in nun ding kan si. Cucu Khrih ah mithar kan sinak a si. Asinain keimah cu Pathian fa ka si ti lawngin a za lo. Pathian fa kan si kha mi dang nih an hngalh khawhnak hnga a biapi deuhmi a si. Eg. Va ngei cia nu pakhat nih kei cu va ka ngei cang a tinak in, va a ngei cangmi a sinak kha a nunnak in a langtermi kha biapi deuhmi a si.

Hell tlak timi hi a kan sertu pa biakhiahnak a si. Mi thalo paoh Hell kan tla lai tinak a si lo. Thong a tlami hna paoh hi misual an si lo. Cu bantukin a kan sertu pa nih nan sual lo a kan ti cang. Jesuh thawngin kan sualmi kha na suallo ti biakhiahnak a si cang. Ni hin ah Hell a kan thlatu ding cu kan Nifatin sualnak hi a si lo. Kan Adam sualnak hi a si lo. Adam sualnak cu minung nih ngaihchih khawh a si. Kan duhfaknak, phorhlawtnak, le ruamkainak hna hi a si. Cucaah Pathian pennak chungah sual ngaihchihnak he kan lut a hau cang. Cuti cun Khrih nih a pennak hmun ah kan lut kho lai. Kan thinlung chungah Pathian nih a kan pen cang maw ti hi a si. Jesuh nih pen lomi nunnak cu tih a nung tuk. Mi cheukhat cu kan pumsa duhnak tu nih  a kan um. Pathian pennak le sual ngaihchihnak cu a kal timi a si. Cucaah Pathian pennak hi kawl hmasa u a ti (Mtt. 6:33).

Bawi Jesuh nih vancung pennak cu mi pakhat nih misur dum rian a tuannak he aa lo a ti (Mtt. 20:1-16). Mi pakhat nihcun misur dum a ngei i kuli rian a tuanter hna. Cheukhat cu 6:00 am in an tuan, cheukhat cu 9:00am in an tuan. Cu bantukin 12:00 pm in a tuanmi zong an um, 3:00 pm in a tuanmi zong an um, 5:00 pm in a tuanmi zong an um. Asinain a khat tein fangkhat cio a pek hna. 5pm in a tuanmi pawl cu an i nuam ngai. Zingka in a tuanmi hna cu an zai. Kan nih cu chun nitlak kan tuan an ti. Lo ngeitu pa nih kan hleng hna lo kan bia ningte a si ko, a hnu in a rami hna pek ding zat cu keimah nawl a si ko a ti. Jesuh nih vancung pennak nun timi cu mah tahchunnak bantuk hi a si.  Mah tahchunnak nih a langhtermi cu lo ngeitu pa thinlung nakin phaisa pekzat ruangah a buaimi pa thinlung tu hi a si deuh. Hi pa nih nikhat ah a tuanman a hmuh ko nain mi dang hmuhmi cungah zirngeihnak a ngei. Bawi Jesuh nih a kan cawnpiakmi cu mi nih an tin comi cungah lawmpi thiam hi a si. Pakhat le khat nun hrawm hi a si. Amah zong nih nun a rak kan hrawm. Cucaah Paul nih Rom ca a khuatnak hna ah “Aa lawmmi hna sin ah va lawm ve u, a tapmi hna sin ah va tap ve u” a ti (Rom 12:15). 

A donghnak ah, Mtt. 18:1-2 kong hi chim ka duh. Zultu pawl nih Bawi Jesuh kha vancung pennak ah ho dah a ngan bik na pennak ah tiah an hal, “Jesuh nih ngakchia pa te pakhat kha a auh i a hmai ah a dirter i nan nih cu nan i tlen i ngakchia bangtuk ah nan i caan lo ahcun vancung peknak chungah nan lut kho lai lo” a ti hna. Kan nih cun vancung pennak chung ah um cu kan duh naisai lo. Mi toi ah kan i dor kho lo. Kan lungthin kan thup kho lo. Ngakchia cu an i si nain an i rem cawlh. Kan nih cu kan fe hmaiah kan i si zungzal. Ngaichia cu an pale nihcun an tuah khawh dih tiah an zumh. Cucaah ngaichia bantukin nun in vancung pennak nun ngei cio hna usi. Cu lawngah Pathian pennak chungah kan lut kho lai.