KAN CAKHENMI CU NANMAH HI NAN SI.

Bible cherhchanh: 2 Kor. 3:1-3

Paul chan ah hin cawnpiak sual tampi an rak um. Knowstic pawl an timi hna hi thlaraumi kan si hnu cun sualnak kan tuah zongah sual a si ti lo an rak ti. Kan sual hmanh ah thlarau mi kan si cang caah nupa sualnak kan tuahmi zong cu, vawlei le vawlei a hnor menmi a si caah sualnak a si lo an rak ti. 

Cucaah Galati cakuat te hna, Timote cakuat te hna khi cawnpiak sual an umnak kong le ralrin ding lawngte an si. Khrihfa a si lomi catial thiam Lucian an timi nih hi tin a chim. “Khrihfa pawl cu an lung a thiang, an lungthin a tluang tuk i sii i khen in mi zoh ka thiam a timi tuktak hna hmanh nih an hlen khawh hna” a rak ti. Cucaah hi chan lioah thawngtha chimtu a si le si lo, theihpinak ca an rak i ken tawn.

Zei ruangah mah caken hi a herh ti ahcun, Judah biaknak chung ummi hna zong nih an chimmi thawngtha he a kalhmi a rak um ve. An nih cun nawlbia a tanhmi an rak si. Cucaah cuarpar tan te hna kha an dirpi. Cu bantuk thil tete a um ruangah theihpinak ca tialpiakmi ken lo cun Judah biaknak a horsuangmi an si kho. Cucaah Jeruslem in Judah upa hna nih an minung a simi hna kha theihpinak ca an rak tialpiak tawn hna. Cucaah Paul nih “midang bantukin kan nih zong nanmah tialpiakmi siseh, nanmah sin kuatmi siseh, thangthatnak ca i ken kan herh ve dah ra” a ti.

Paul nih hi tin a chimmi cu, amah cu mi theih cia an si. Korin Khrihfabu le a kiangkap um Khrihfabu tete hna zong Paul thlaici lawngte an si. Cucaah Paul nih cakhen dang kan herh lo a ti. “Kan ca kenmi cu nanmah kha pei nan si cu”  a ti. Cu ca cu “thinlung chungah mi vialte hngalh awk le rel awk ah tialmi, lung cung ah cahang in tial loin minung lungthin chungah a nungmi Pathian thlarau nih a tialmi a si” a ti. Nanmah pei nan si cu a timi hna cu Korin Khrihfabu le kiangkap um, amah nih  Khrihfabu a dirhmi tete hna kha an si.

Lung cungah cahang in tialmi siloin timi cu nawlbia kha a chim duhmi a si.Nawlbia kha lung cungah rak tialmi a si. Nawlbia cu mit in rel khawhmi a rak si ko nain mi nunnak ah a um lo. Nawlbia timi cu sual kan sinak fiantertu a si. John calvin nih nawlbia timi cu zan i arfi le thlapa pawl a ceu tuk ko nain chun ah ni ceunak nih a ceuh tikah an ceunak a loh bantuk a si a ti. Cu bantukin nihin ah nawlbia a um ti lo tinak a si lo. A um ko nain Khrih dawtnak kha kan chungah a ceu deuh cang.

Paul nih a chim duhmi cu thawngtha bia an chimnak thawngin thlarau nih an thinlung chungah rian a tuan. Cu hna an nunnak in a chuahmi dawtnak, zawnruahnak, toidornak, pumpeknak, siannak thinlung hna kha thawngtha bia chimtu taktak kan si le silo a langhtertu kan caken (tehte) cu a si ko a ti. Cucaah cu hna cu kan caken mi cu nan si a tinak kha a si. Phundang in chim ahcun Khrih ah mithar si tikah thlennak nun, nuntharnak, nun ngeihmi kha rel khohmi ca bantuk an rak si. Cucu Paul nih kan i kenmi theihpinak ca cu a si a ti.

Rev. Biak Peng nih a phuahmi hla, “khrihfa cu Bible cathiang kan si. Hawi danng nih nitin in an kan rel. Pumsa in maw na nunnak na tial lai. Hell ram ah maw na re te lai. Kan nun zia in Bible cathiang kan tial, Kan nunning in tuanbia kan tial” a ti. Cu bantuikin khuaika ram kan kal hmanh ah Laimi le Khrihfa aa then kho lo. Kan phanhnak hmun kip ah Laimi Khrihfa kan sinak theihpinak ca aa kenmi miphun kan si. Cu theihpinak ca cu kan nunning hi a si. Cu ca cu miphun dang nih kanmah ah an relmi cu a si.

Laimi kan phanhnak hmun kip ah Israel miphun bantukin Biaktheng caan ah Biakinn te kan sak. Lungthin khat tein kan umti hna. Bawipa kan thangthat. Pakhat le khat kan i bochan. Pathian sin in kan hmuhmi thluachuahnak hna kan i hrawm. Mah nan lungput le nan tuahsernak te hi riantuantu hna nih kan i kenmi a si.

Paul nih hi kong a chimnak a ruang cu Jeremiah 31 siseh, Ezekiel 11 le 36  siseh, Pathian in a minung biakamnak thar a tuah dingmi kha a lakmi a si. Phung dangin chim ahcun, minung thinlung i tial dingmi biakamthar kong asi. Cu Profet pawl sin a chimmi biakamthar cu Jesuh Khrih ah a rak tling.

Greek holh ah thar timi hi phunhnih in a um. Eg. Hmun dangin khua pakhat ah a thil mi khi mithar sinak phun khat a si. Cun Siangpahrang nih a fapa kha amah rian changtu ah a chiah ah cun sinak thar a ngeimi a si. Cucaah Paul chim duhmi cu Jesuh nih Siangpahrang bantukin a kan cawisangnak nun kha a si. Cu nun cu minung thinlung chungah thlarau in tialmi a si. Nihin ah Pathian nih Paul te hna hmangin Korin khua te hna, Efasa khua te hna ah cakuat a tial bantukin a tial ti lai lo. Jesuh Khrih cakuat cu nangmah le keimah hi kan si cang. Kan nun hi miphun dang nih rel ding a si cang. Pathian nih caken dang a ngei ti lo. Zumtu nang le kei hi kan si.