SENTHANG PENG PATHIAN RIANTUAN HMASA HNA

1.Rev. Za Ling (A)

Sakta khuami Pu Bual Hmung le Pi par khuah i fapa pahninhnak a si. 1907 kum ah a chuah. 1916 kum ah Sakta ABM Primary Sianginn ah ca a cawng. 1910 kum ah Rev, Cope nih tipilnak a pek.

 1928-1932 tiang Hakha khua Dr. Strait kuttang ah Baibal ca a cawng. Baibal ca a cawn pah in Strait Siangbawipa rian a bomh. Kum 1932 May 5 ah Joseph le Lakhu i an fanu pathumnak Meble he thitumhnka an tuah. 1933 kum in Senthang peng le Zotung eng, Sakta khua in a zoh hna. 1940  kum ah Ordination an pek. Rev. Za ling A cu zathal khua zongah kum hnih Pathian riantuan in a um. 1982 kum ah pension HBA nih an pek. Amah nih tipil a pekmi hna cu Zotung peng ah 644 Senthang peng ah 200 an dihlak 844 an si. October 9, 1998 kum ah Pathian sin ah a din. Amah hi Cozah nih kawlram ah biaknak pakhat lawng ka tuah lai a ti, 1961 kum lio ahkhan raltha ngai in duhlonak langhtermi hna hruaitu pakhat a rak si ve. 

2. Rev. Chan Let

Rev. Chan Let cu Pu Ral Ling le Pi Sal Eng hna i an fapa pahnihnak a si. Surkhua Mission Sianginn ah riantuanmi Saya Zo Mawng cawnpiaknak thawngin 1927 kum ah Khrihfa a lutmi a si. Strait Siangbawi nih Hakha ah march 11, 1933 kum ah tipilnak a pek. 1936 kum ah Siangbawi nih Rezuan Khrihfabu zohkhenhtu ah a rak chiah. 1848-1951 tiang Hakha ah Baibal ca a cawng. Sianginn a dih in Surkhua ah Pathian rian a tuan. February 11, 1955 kum HBA Vanzang Civui ah Ordination an rak pek. Amah cu ZBCFC ah kum 9 tiang rian a tuanmi a si. 1983 kum ah HBA nih pension an pek. 1967 kum in zeng zawtnak in dam loin a um i February 11, 1987 ah Pathian sin ah a din.

3. Rev. Hram Phen

Rev. Hram Phen cu Hausen khuami pu Hlawn Hmung le Pi Man Ki fapa a si. Novenber 25, 1913 kum ah a chuak. 1926 kum in Surkhua Sianginn ah ca a cawng. 1930 kum in Daidin khua phungki Sin ah kum hnih um. 1938 kum ah tipil a ing. 1945 ah Senthang peng nih Saya caah an hman. 1948-1951 Hakha Baibal Sianginn ah a kai. Sianginn a dih i phungchimtu rian an Siangbawi nih a pek cawlh i Sakta area Rev. Za Ling A bomtu ah an hman. 1981 kum ah pension a lak. 1984 kum ah Pathian sin ah a din. A nupi cu Man Thluai a si.

4. Rev. Za Ling B

Pu Co Hmung le pi Tial Eng hna i an fapa a si. May 28,1928 kum ah a chuak. June 1, 1928 kum Surkhua ah tang 4 a cawng. January, 1940 kum ah Khrihfa a lut. February 2, 1945 ah tipil a ing. 1946 ah Pi Sam Tang he thitumhnak an tuah. June, 1948 kum in Hakha ah Baibal Sianginn a kai. March 1, 1952 kum Laitlang Civui Hmawngtlang khua ah Saya min an pek. February 13, 1955 kum Vanzang khua Civui ah Ordination an pek. February 26, 1988 kum HBA traienial Civui, khuapi khua ah pension an pek. Pension a lak khawh in area nih an sian lo caah kum 8 chung a bomhthan hna. Pathin nih nihin tiang nun damnak a pek i thawng ngai in a kan nunpi rih. A chim tawnmi cu, “Pathian caah cun zei bantuk rian hmanh hi tangdor tein kan tuanding a si ko”

5. Rev. Chum Cin

Khuapi khua Pu Kap Ling le Pi Bo Nawn i an fapa upa bik a si. June 20, 1938 kum ah a chuak. 1950 kum ah Khuapi khua SBS ah tang 4 a awng. June 8, 1952 kum ah Khrihfa a lut. Novenber 2, 1952 kum ah tipil a ing. Tang 7 a awn hnu ah Baibal Sianginn a kai i 1959 kum Zomi Theological School in Dip-TH degree a hmu. June 3, 1962 kum ah Pi Khuang kawi he thitumhnak an tuah. February 18, 1968 kum HBA Civui Lungrang khua ah Ordination an pek. Senthang area hmunkhat tein riantuan ti ding ah Senthang area Union tiah an i fonh i kum 12 chung Secretary a tuanpiak hna. Sakta area khuapi khua ah kum 10 a tuan hnu ah Sakta area Keizuan le pongkam zohkhenhtu ding ah an hal i May 28, 1971 kum ah Keizuan a phan. Pension a lak hnu ah Bungzung khua ah um in nihin tiang a kan nunpi kho rih.

6. Rev. Tluang Kung

Rev. Tluang Kung cu Pu Tong Hmung le Pi Hlei Eng hna i an fapa ngeihchun a si. October 10, 1939 ah a chuak. 1958 ah Surkhua State Middle Sianginn tang 7 a dih. June 1958 in Hakha Siangbawi Rev Johnson kuttang ah Baibal Sianginn a kai. 1962 kum ah falam khua ZBTS Sianginn in a dih. February zarhhnihnak 1962 kum HBA Civui lungcawite ah Saya min an pek. Rev. Chan Let kuttang ah rian a rak tuan (Cu lioa h Surkhua area chungtel an rak si). February zarh donghnak 1972 kum Zephei (B) khua HBA Civui ah Ordination a pek. 1998 kum SBA traiennial Civui ah pension an pek. Pension a lak khawh in kum zeimawzat a bomh than hna.15/11/2016 ah tha dih le zangba in Bawipa rian a tunanka in amah Bawipa sinah a din. Nihin tiang dam tein a kan nunpi rih. A chim tawnmi bia cu, “Bawi Jesuh cu mah le nunphung holh in bia a chimmi a si. Cucaah kan Senthang ram ah ra she law John 6:35 chung bia; kei cu nunnak changreu ka si” timi bia hi “kei cu nunnak thavahau ka si” a ti hnga” a ti tawn.

7. Rev. Hrang Nawn

Rev. Hrang Nawn cu Surkhuami Pu khua Hai le Pi Sun Hai hna i an fapa a si. 1953 kum Khrihfa a cang. 1962 kum ah tipil a ing. 1968-1972 tiang Baibal Sianginn a kai. March 1, 1972 kum Laikang Civui ah Saya min an pek. February 26, 1977 kum Keizuan khua HBA Civui ah Ordination an pek. 2002 kum ah pension a lak. January 4, 2008. kum ah Pathian sinah a din. A nun lio a chim tawnmi bia hna cu, “nitlaklei minung hna nih kan ram ah mission rian an rak tuan hi lunglawmhnak ngai cu a si. Asinain an kir than tikah an angki leng (Coat) an kaltak i cu angki cu laimi nih kanmah nunphung angki bantuk ah kan ruahmi hi a pawi ka ti. Aruang cu midang nunphung upatnak thinlung a chuahter” a ti.

 =An len ee, min chim a dai lai lo. Cungchin vanbawi thlazung tangah, nunnak thawngtha aupi tawn hna. (Keimah nih ka phuahnak mi hna a si).

Cherhchanhmi :

1. Rev. Za Ling A a thih lio caanhmannak progrem ah an tialmi a tuanbia tawi.

2. Pastor That Mang nih Dip-Th thesis page 56,57

3. Pu Kap Ling (Hausen) interview by tha author 1/1/2001

4. Rev. Za Ling B interview by the author

5. ESBC tuanbia page 55-56

6. Rev. Tlung Kung interview by the author 2001