SENTHANG BAPTIST ASSOCIATION TUANBIA TAWI

             

The Chin hills Baptist Assiciation timi, laimi khrihfabu vialte hawikomhnak cu Rev. Carson hruai nakin 1907 kum March thla ah rak thawk. 

Cu hna cu Tidim, Falam le Hakha, Khrihfabu hna an rak si. 1907 kum thawk in American Baptist foreign Baible society nih bomhmi phaisa cu Siangbawite min in si ti loin Chin Hills Baptist Association min in an tlunter. Cun bomhnak tangka zong cu kumkhat hnu kumkhat an tlawmter lengmang. Cucaah Laimi Khrihfa nih thawhmi phaisa cu a tamdeuh chin lengmang ve. Mah le ke tein dir awk ah an i zuam lengmang. Cu hnu ah Chin Hills Bapatist Association Civui pi cu 1948 kum March thla ah Falam pengkulh Hualngo ram, Satom khua ah an rak tuah i cuka meeting cun Association pathum, Hakah Baptist Association, Falam Baptist Association, le Tidim Baptist Association tiah Association pathum rak dirh a si.

     Cuti thil a si caah kanmah Senthang peng zong cu Hakha Baptist Association chungtel kan rak si. Cu hnu tlawmpal ah Thantlang peng cu Cozah nih Myone pakhat in a rak ser caah a dang tein an rak um. Cu bantuk thil umtuning nih Khrihfa lei thithruainak zong a dang tein um a herhnak tete a chuahpi ve. Cucaah October, 1973 kum ah Biaknak lei upa hna nih CBC (ZBA) ah Association cu an hal i pek an rak si. Cu hnu Hakha Baptist Association cu Senthang peng Khrihfabu le Hakha peng Khrifhfabu, (Hakha peng Khrihfabu chungtel hna cu, Hakha, Chuncung, Khuabe le Beute, Cawbuk, Lolung, Lichia, Kuhchah, Buanlung Dongvaa hna an si) Zokhua peng Khrihfabu, MiE peng Khrihfabu hna lawng kan rak tang.

     Senthang peng cu, Senthang  Baptist Association a rak um hlan ah Senthang peng Union an rak tuah. An thawhlawm dihlak fonh loin pehtlainak fune an thawh ciomi lawng in riantuan tinak le hawikomhnak a rak um. Cu Senthang peng Union cu 1973 kum march ah Phaipha B Civui in a rawk. Area 3 le Local pakhat in kan i then. Cu hna cu Sakta area, Surkhua are, le Lungrang area a rak si. Cu area pathum cu HBA ah direct i pehtlai a si caah Senthang peng hmunkhat tein riantuan tinak a rak um kho ti lo.  Cuti, Senthang peng hmukhat te ah rian tuan ti khawhnak a um ti lo caah kan dihlak area pakhat ah fonh in HBA ah pehtlaih ding in duhnak a rak ngei. Aruang cu area pakhat chung tal ah riantuan ttinak ngeih rak duh caah a si. Cucaah 1980 kum ah Senthang peng dihlak sizungzi tuah ding in an rak kal. Cu sizungzi tuahnak ah an telmi Pastor pawl cu Rev. Tial Lian, Rev. Tluang Hu, Rev. E. Tin Thang, Rev. Ceu Tum hna an rak si.

    Sizungzi an kalnak Khrihfabu sin in ruahnak a chuahmi cu area pakhat ah fonh in HBA ah pehtlaih siloin Association tu lak ding ah rak ti. Cucaah February 27, 1981 kum ah Senthang peng tawnnak an rak ngei. Cu tawnnak ahcun Association lak ding in hnatlaknak an rak ngei. Cucaah March 6, 1981 kum Hniarlawn khua, HBA Civui ah Association halnak ca an rak tial. An ceihpiak hna lo caah February 24, 1984 kum HBA BM Civui Hakha ah voihnihnak ca an rak tial than. An rak ceihpiak thiamthiam hna lo caah February 21, 1991 HBA traiennial Civui Hakha khuathar ah ca an rak tial than. Cu zong ahcun an rak ceihpiak hna lo. Cucaah Senthang peng meeting a kaimi hna cu meeting in an rak chuak i Association  dang tein rak umnak hi a si.

     1991-1992 chung, Kum khat ca in riantuantu pawl an rak thim hna i a tanglei bantukin an si.

President                        Rev. Hrang Nawn

Vice                                 Rev. Tluang Kung

General Secretary          Rev. J. Tial Lian

Tresurer                         U Ral That

Assistant Tresurer        U Kio Hu

Youth Secretary            Rev. R. Tin Thang

Women Secretary         Sayamah Sung Chin ( A taun than lo)

          Cu hnu ah HBA nih Comission an tuah i SBA zung umnak sakta ah an rak lenthan hna. Ca rak tialthan ulaw kan nin pek cang hna lai an rak ti hna. Cuticun Febuary 21,1992 kum Zokhua HBA, BM Meeting ah ca cu an rak tialthan. Asinain cu zongah cun Associatian cu Triennial lawng nih a ceihkhawhmi a si caah 1994 kum ah kan nin ceihpiak te hna lai an rak ti hna. Cu ruangah ZBC meeting Hakha ah direct in Association halnak ca Meeting a kaimi (delegate) hna nihcun an ceih cawlh i March 29 9:am ah No, 254/145 ningin ZBC nih Senthang peng tipil Khrihfabu cu Association pakhat siding ah cohlannak a ngei. Cuhnu ah Myanmar Bapatist Convention nih Senthang Baptist Association cu MBA traiennial Meeting Muse khua, December 25, 1993 kum 3:pm ah Assotiantion pakhat siding in cohlannak a ngei. Cuti cun Senthang Baptist Association cu Chin Baptist Convention ah le Myanmar Baptist Convention ah chungtel pakhat a rak si.