ECUMENISM

                                                                            

Biahram Domhnak

Ecumenism biafang hi Khrihfa nih kan hmannak a hram cu International Missionary Conference (Protestants) pawl nih Edinburgh ah an tuahnak 1910 kum in hram aa thawkmi a si.  Asinain Ecumenism timi biafang sullam ningin cawlcanghnak hi chanthar cawlhcanghnak a si lo, zumtu hmasa hna lungput le cawlcanghnak in a rami a si.  

 Thesaurus, Encyclopedia, Wikipedia nih a fianternak ahcun, Ecumenism biafang cu Greek holh oikouneme a rami a si i oikos ti cu inn tinak a si. A sullam cu Vawlei (inn) pakhat ah hmunkhat tein umtimi (the inhabited world) ti chimnak ah an rak hman. Vawleicung Khrihfabu vialte pehtlaihnak biafang caah hmanmi a si. Ecumenism kan theihning tlangpi cu Khrifabu dangdang hna he pehtlaih in riantuantinak le unau tha sinak hi a si bikmi a si ko.

Ecumenism aa sersiamnak (formation period).

Khrihfabu pumkhat sinak le riantuantinak (Ecumenical theology ) hi Bawi Jesuh nih “nan nih pumkhat nan sinak caah thla ka camnak” (John 17:21) ti a chimmi kha hram aa bunhmi a si. Cu bantukin pumkhatnak le tuantinak a um khawhnak ding caah i sersiamnak le ceihtinak ngeih hi (Lam. 15) ah kan hmuhmi Jerusalem Council in khan aa thawkmi a si. Cuhnu ah zumtu pakhat le khat karlak ah i theihthiam lonak tete a ummi chungin rem le dawt tein an umnak ding caah ceihtinak tuah a si tawn. Roman Catholic le Eastern Orthodox Khrihfabu nih an pomti khawmi ecumenical assembly ngan taktakmi voi 7 tiang an tuah.  Cu hna cu, Nicea – AD 325, Constantinople – 381, Ephesus – 431, II Ephesus – 449, Chalcedon – 451, II Constantinople 553, III Constantinople -680-681, Quinisext Council or Council in Trullo – 692, II Nicea – 787 an si.

Ecumenical cawlcanghnak (Ecumenical movement)

Kum zabu 16th Khrihfabu sersiam thannak cawlhcangnak (Reformation Movement) a rak chuah hlan AD 1053 hnulei kha cu Khrihfabu pakhat lawng a rak um. Cu hnu ah Europe Khrihfabu pahnih Roman Catholic le Eastern Orthodox Khrihfabu tiah an rak i then. AD 1517 kum in Martin Luther nih Protestan movement a tuah hnu khan cun Khrihfabu dang dang a rak chuak i cu hna khrihfabu sinin kum zabu 18 le 19 nak ah cun thawngtha chimnak nawl lam thar (missionary movement)  ngan taktak a rak chuah. Asinain cuti thil a si lioah Khrihfabu karlak ah theihthiam lonak a  um pah ve. An riantuannak ah hlawhtlinnak tampi a um ko nain zumhnak an kalpi ning aa khah lonak le thithruainak aa khah lonak tete hna nih pumkhat sinak don khamtu le i thencheunak tete a rak chuahpi. Cucaah pakhat le pakhat theihthiamnak ding caah 1910 kum ah khan Scotland ram Edinburgh khua ah Vawileicung pum huap missionary conference (World Missionary Conference) auh a rak si. Cucu Ecumenical movement aa thawknak hrampi a rak si.

Cuhnu 1921 kum ah International Missionary Council (IMC)  an rak tuah. A biapi bikmi cu Vawlei pumpi huap in thawngtha chim  (World Evangelization) a si. 1925 kum ah “Faith and Order Movement” timi an tuahthan i Vawlei pumpi Khrihfabu pawl hna nih thawngtha chim le pakhat le khat i theihthiam in pumkhat sinak hi an rak au pi. 1927 kum ah Life and Work Movement timi aupi than a si i Pathian nih minung a serchan, a tak in dirhmun a hmuh khawh nakding in mah le biaknak cio zoh loin biaknak dang dang hna zong he naihniam tein khua kan sak ti khawhnak ding caah lam sialnak le hma laknak an rak ngei. Hiti karhlannak an ngeihnak ruangah 1948 kum, Amsterdam khuapi tonnak in World Council of Churches (WCC) hi hram fek tein dirh a rak si.

Kum 2013 tiangah khan a dirhmun cun ram 110 in Khrihfabu 345 hna nih pehtlaihnak an tuah. Khuakhan lairelnak sang bik cu kum 8 dan ah voikhat itonnak an tuah. WCC rak dirh kaa in nihin tiangah voi 10 tuah a si cang. Cu hna cu a tanglei bantukin a si. Pumhnak hmasa bik cu Amsterdam 1948-ah an tuah. An tlangtar cu  “Man’s Disorder and God’s Design” ti a si. A voihnihnak cu Evanston, Illinois-ah 1954 khan an ngeih than. An tlangtar cu “Christ the Hope of the World” tih a si. Assembly voithumnak cu  New Delhi-ah 1961-kum ah an ngei. An tlangtar cu “Jesus Christ, the Light of the World” ti a si. Assembly a voi 4 nak cu Sweden ram Uppsala khuapi ah  1968 kum ahkhan an tuah. An tlangtar cu “Behold I make all things New” ti a si. Assembly a voinganak cu Kenya ram khuapi Nairobi-ah 1975 kum ah an tuah. An tlangtar cu " Jesus Christ Frees and Unites” ti a si.  Assembly a voi ruknak cu Vancouver, British Columbia, Canada-ah 1983 khan an tuah. A tlangtar cu, “Jesus Christ the Life of the world” ti a si. Cuticun an tuah lengmang i Assembly 10th cu Busan, Republic of Korea khuapi ah 2013 khan an tuah. Tlangtar ah “God of Life, lead us to justice and peace” ti a si.

Zei ruangah Eumenism a rak herh.

Khrihfabu tuanbia kan zoh tikah mit in hmuh khawhmi Khrihfabu hram aa thawknak cu Antioch khua in a si. (Asinain theology mit in cun vailam cung i Bawi Jesuh a thihnak in a si.  Zeicahtiah Jesuh vailam cung a thihnak nih khan mit in hmuh khawh lomi thlarau khamhnak thilti khawhnak a ngei. Cucaah Hebru catialtu nih "zumhnak kan timi cu mit in hmuh khawh lomi a taktak le a ngaingai a si tiah kan va zumhmi kha a si" a ti). Antioch khua in Ephasa, Close le Galati khua hna in Khrihfabu cu Asiaminor, Greek pennak le Europe ram cheukhat a phan. Zei ruangah mah tlak in an karh khawh kan ti ah cun lungkhat thinkhat tein zumhnak pakhat le biaknak pakhat tang ah an rak um caah a si. Khrihfabu hrampi an rak si. 

Asinain ngaihchiat ngai a simi cu AD 1053 kum ah Constantin khua ah Rom miphun 60000 hrawng an rak um. Judah miphun cu mi tlawmte an rak si. Cu tikah Rom miphun le Greek miphun kha an rak i rem lo. Rom miphun Constantin khua chung um Khrihfa hruaitu Pope nih Greek miphun nih nanmah holh nan hmang kho lo, cun Khrihfa biaknak hi nanmah ruahnak in nan kalpi kho lo a rak ti hna. Cu ruangah Greek miphun hna zong nih Constantin khua chung um Rom miphun hna kha Greek nunphung in nan nung lai an rak ti ve hna. 

Cu ruangah crusade (raldonhnak) nganpi a rak chuak i mi tampi an rak thi. Greek miphun nih Rom miphun cu minung 40000 an rak tlaih hna i Turki ram ah an rak zuar hna ti a si. Cu liote ah Muslim pawl nih cantha an rak lak i an tuk hna i anmah ram le biaknak ah an rak canter dih hna. 
Cucaah nihin ah Close khua, Efasa khua le Galati khua hna an um ti lo. Zanmang bang an lo dih cang. A ruang bik cu kan mah holh, kanmah nunphung, kanmah biaknak timi lungput an rak ngeih caah a si. Hi bantuk hi Chin Khrifa hna lak zongah a um kho lai lo ti khawh a si lo. Bu pakhat le khat ral kan dohmi hi pumkhat sinak thazang a zartertu a si. Cun pengtlang in kan tanmi zong hi pumkhat sinak thazang a dertertu a si. Cucaah Ecumenical movement kan herh. 

Biadonghnak 

Nihin tiang ah Chin Baptist Convention nih Khrihfabu dang he lungrual tein rian tuantinak kan ngei. Cu lengah biapi ngai ah kan ruah. Cu bantukin GCCF, CARD, YMCA, le MCC tbk hna he rian kan tuanti hna. Lung khat tein riantuantinak hi Pathian duhmi a si. Chin miphun cu a liamcia caan kan zatlang nuntinak zohthan ah Ecumanical experience a rak ngei ngai cangmi kan si. Cu bantuk lungput he cun Pathian ram kauhnak ah lungrual tein riantuan chin kan herh. 

Cherhchanmi:

1. En.wikipedea.org/wiki/ecumenism 

2. Rev. Dr. K. Lalrinthanga ‘WCC le sahrang’ 

3. 3. Rev. Samuel Lalremsanga.

4. 4. PC Biak Siama :WCC le Ecumenical