THLACAM THILTI KHAWH THAWNNAK

 Jame 5:13-18, Matthai 7:5-15

Vawlei ah zumtu nih harnak phunphun kan ton tawn. Cu tik-ah bomchantu dingah Pathian kan au tawn. Asinain a can ahcun Pathian nih kan thlacamnak hi a kan let lo tiah kan ruah caan a um tawn. Thluachuahnak kan halpiak hna nain vanchiatnak kan ton tawn. Damnak kan hal nain thihlohnaktu kan ton tawn. Hlawhtlinnak kan hal i kan hlawh a tling tawn lo. Zeiruangah a si hnga? Bawi Jesuh nihcun “Hal u law kan pek hna lai, king u law innka cu hunpiak nan si lai, kawl ulaw nan hmu lai” (Mtt. 7:7) a ti. Bawi Jesuh biakamnak hi a tak a si lo a si hnga maw? Asiloah Pathian hi a um taktak lo a si hnga maw? Mah pawl hi zumtu thinlung chungah a um tawn.

Cuti vaivuai in kan um lio-ah zumlotu hna nih caantha laknak ah an hman ton. Christofar Hitchan (Amah hi Pathian a um lo ti a zumtu ‘athei’ a si) nihcun hi tin a chim. America ah cyclone thilpi a hran lio-ah zumtu pawl cu kuthler in Pathian sin-ah thla an cam. Asinain thlacam bu in ti nih duhsah tein a phum hna a ti. Cucaah thlacam cu hawikom sin i lungduh bia chim bantuk men a si a ti. A tak hmuh ding a um lo i midang lomhternak tinhnak men a si caah a herh lomi a si a ti. Zeiruangah tiah ruahchannak hman lo a pek hna” a ti.

Asnain thlacam hlawh a tlinnak kong cahlun chungah tamp ikan hmuh. Moses nih Pathian sin thla a camnak thawngin rili sen kha aa cheu i Faro ralkap thawnnak chungin an luat. Joshuah thla a camnak thawngin Ni kha a dirter kho (Joshua 10:12). Daniel zong kha thlacam mi a sic aah Chiandeih ka chungin a luat (Daniel 6:22). Bawi Jesuh nih thla a camnak thawngin thil khuaruahhar a tuah len. Cucaah thlacam hi Amah nih a kan cawnpiakmi a si. John 14:13 “Pa sunparnak cu Fapa thawngin a langh khawhnak hnga ka min in nan halmi paoh cu kan tuahpiak hna lai”.

John 15:16 “Ka min in nan halmi paoh cu ka pa nih an pek hna lai”. Pathian sin ah Jesuh min in kan halmi paoh cu pek ding dawh a si. Biatak kan chimh hna vawlei ah mi pahnih nih lungkhat tein thla an cam ahcun vancung um ka pa nih an pek hna lai (Mtt. 18:19) a ti. Tonny Evans nih cun “Thlacam hi Pathian sin in hmuh kan duhmi kan va hal khi siloin Pathian sin in kan herhmi a rat hnga ding ca tu ah kan cammi a si” a ti.

Thlacam hi thil pakhat hmuh duh ah halnak men a si lo. Cun kan duhmi thil chuahternak seh bantuk a si fawn lo. Lunglomhnak biachim, thangthatnak, sualphuannak hna aa telmi a si. Cuti cun zumtu hmasa hna nih Pathian sinah fakpi in thla an rak cam tawn. (Jame 5:13-18) Bible cang in zumtu hmasa hna sin-ah Khrihfa bu thar a chuahnak le an nun zia kan hmu kho.

Vs 13, “Nan lakah harnak a tawngmi nan um ahcun thlacam hna she” a ti.  Zumtu hmasa hna kha harnka le inturnak ngan pipi an ton tawn hna. Cu tikah thlacamnak hi an hriamnam tha bik a rak si tawn. Cucaah Khrihfa cu thla a cammi kan si.

Vs 14 “A zawmi nan um ahcun Khrihfa upa kha au hna u law thla in campiak hna she” a ti. Damnak hi minung kan nunnak ah a biapi ngaimi pakhat a si. Asinain taksa damlonak long a si lo. Minung nih dam lonak phun tampi kan ngei. Cuti kan dam lo tikah Khrihfa upa nih thla in campiak hna she a ti. Pathian nih Amah caan ah Khrihfa upa le pastorte cu a chiahmi hna a si. Khrihfa upa le pastor hna cu an thlacam kha an zumhnak tahnak ah kan hman tawn hna. Vs 15 kan zohthan tik-ah RSV version ahcun “The prayer of faith will save the sick, and the lord will raise them up” a ti. Damnak ca lawngah a si lo. Harnak kan tonmi cungah in khawhnak le a tur zia thiamnak hna le harnak kan tonmi pahchih khawhnak thazang hna aa tel chihmi a si. Khrihfa upa le pastor thlacam kan sawm in, anmah thlacampiaknak thawngin kan harnak tonmi kha pahchih khawh thawnnak le intur zia thiamnak a kan pek.

Vs 17, “Elijah thlacamnak kan hmuh. Elijah hi kanmah bantuk minung a si ve ko. Asinain ruah sur hlah she tiah biatak tein thla a cam i kum thum le a cheu ruah sur loin a um” a ti. Mah Bible cang hi 1 king 17:1-7 kha a lak thanmi a si. Asinain hi ka zawn ah Elizah thlacamnak kan hmu lo. Asiah zei ruangah mah Bible cang hi a lak hnga? Kan nih Pathian bia a cawngmi hna nih kan hman bikmi cu new revised standard version (NRSV) a si. Hi chungah cun “As the lord the God of Israel live, before whom I stand” a ti. Mah ka zawn ah Pathian hmai ah dir timi hi thla a cam kha a chim duhmi a si. Thlacam tinak a si. Cucaah Elizar nih zei bia a chim zei thil a tuah hmanh ah Pathian hmai ah a dir (thla a cam) hmasa zungzal. Cucaah ruah sulter khawhnak le sulter lonak cu a thlacamnak thazang in a chuahmi a si. Cucaah thlacamnak nih thil a ti kho tinak a si.

Khrih hnu zultu kan sinak ah nunphung pakhat kan i chapmi cu thlacam hi a si. A biapi ngaimi a si caah Bawi Jesuh zong nih biapi ngai ah a ruat i zeitin dah thla nan cam lai ti a kan cawnpiak. Cucu Mathai 6:5-15 ah khan kan hmunh. Vs 6 ahcun “Thla nan cam tikah nan innkhan chungah lut u law innka nan khar hnu ah mit hmuh lo nan Pa sinah thla cam u. Cun thli tein nan tuahmi a hmutu nan Pa nih nan that man an pek hna lai” a ti. Hi lio chan ah hin mi nih ka hmu hna she tiah thla a cammi an um len rua.

Thlacamnak lawng nih Pathian lung a thlen

1. David: David cu ralkap bu hna kha ram chung minung milurel awkah a fial hna. Cu tikah pathian cu a thinhung i Jeruslem kha hrawh awk ah vancungmi a thlah. Cu tikah David nih khua a hun zoh i van le vawlei kar ah Bawipa vancungmi a dir kha a hmuh. A kut in vainam phawi cia aa put i Jeruslem lei kha a sawh. Khi tikah David le upa hna cu buri an i aih i vawlei ah an bawk i Pathian sinah lungtak tein ngaithiam an hal. Cu ruangah Bawipa nih David thlacamnak cu a theihpiak i vancungmi kha nawl a pek i nam cu a kawngah a sawh than (1 Chanrelnak 21:1-27).

2. Moses: Israel miphun Canaan ram an kal lioah Moses kha tlang cungah a kai i cu ka hmun ah saupi a um caah Isarael mi nih Iaron kha pathian kan serpiak tuah an ti. Cuti cun Iaron nih sui in cawfa a serpiak hna. Mah kha nan Pathian cu a si a ti hna i a biakter hna. Cu kong cu Pathian nih a theih tikah a thin a hung tuk i moses kha a chawn i “hi mi hna hi lungkhawng an si. Ka thinhunnak alh in a alhmi in ka hrawh hna lai” a ti. Cu tikah Moses nih thinlung tak tein a nawl i “A alh in a alhmi na thinhunnak cu i sum ko law na lung thleng law hi rawhnak cu nami hna cungah cun tlunter sawh hlah” a ti. Cu tikah Bawipa cu a lung aa thleng i ka thlunter lai a timi thil thalo kha Israel mi cungah cun a tlunter than lo (Exo 32:10-14).

3. Hezekiah Siangpahrang: Amah cu thi dengmang in a zawt lioah khan Amoz fapa profet Isaiah kha a sinah a ra i “Hi bangin Bawipa nih a ti. Na chungkhar kha a ningcang tein chia tuah; zeicahtiah na thi ko lai. Na dam than lai lo” tiah a ti.Cu tikah Hezekiah nih vampang leiah aa mer i Bawipa sinah lungtak tein thla a cam.Cu tikah Pathian nih “na thlacamnak kha ka theih i na mitthli kha ka hmuh. Zohhmanh kan damter lai” a ti. Cu lengah a nunnak kha kum hleinga kan chap (2 Singpahrang 20:1-6).

4. Jonah: Amittai fapa Jonah cu Pathian nih Nineveh khualipi ah kal in ralrinnak bia chim a fial. Sihmanhsehlaw Jonah cu Tarshish khua lei tu ah a kal.  Bawipa nih a theih i thlichia in a dawi. Cu ruangah Jonah cu rili chungah ah hlawt.Cu tikah Jonah cu ngapi nih a dolh. Jonah nih ngapi paw chung cun lungthin tak tein thla a cam i Pathian kha ngaihthiam a hal (2:1-10).

Isaiah 65:1 ahcun, Bawipa nih aa thawh i, “Ka mi hna thlacamnak kha leh awkah timh cia tein ka rak um ko, Sihmanhsehlaw thla an cam lo” a ti. Matthai 7:7 “Hal u law an in pek hna lai, kawl u law nan hmu lai, king u law innka cu an in hunpiak hna lai” a ti. “Nan fale nih changreu an in hal hna tikah lung a pemi nan um hnga maw? Nga in hal hna she law rul nan pe hna hnga maw? (Mah hi mirang holh in cun “serpent, scorpion” a hman (Lk 10:19). Mah hna hi tih a nung ngaimi a seih a pin ngaimi an si.  Cucaah Bawi Jesuh nih a thlahmi hna minung 70 kha serpent le scorpion lamh khawhnak thawnnak a rak pek hna). Hi tluk in nan that lo ko nain fale kha thil tha pek nan hngalh ahcun vancung i a ummi nan pa chinchin nih cun thil tha cu a halmi kh aa pek chinchin hna lai” (Mtt. 7:11) a ti.