KAN VAWLEI NUN CAAN

Caan timi nih hin hnulei a liam cia, atu lio le hmailei vialte a huap dih. Cucaah minung nih kan hngalh khawhmi le kan rel khawhmi caan hi a tlawm tuk. Zeicahtiah a liam cia caan hi zei caan dah a rauh cang i cu bantukin hmailei ah zeizat dah caan hi a um rih lai kan thei kho lo. A ruang cu tahnak a um lo caah a si. Cucaah rel khawhmi caan a dih hnu cun rel kho lomi caan a phan i cucu "zungzal" kan ti. Cu zungzal caan cu zumtu hna nih kan i ruahchanmi a si. Cun a zumlotu hna ca zongah zungzal caan cu a um ve ko i asinain zeibantuk thil dah an cungah a cang te lai kan thei kho lo.

Cu caan chung ahcun minung hi hrin kan si i cucaah minung nih no lio caan, nungak tlangval caan le tar caan hna kan ngei. Cu hnu ah kan thi. Kan chuah i kan thih ni karlak kha kan dam chung caan cu a si. Cuti ning cun sermi dang hna zong an si dih cio ko. Minung nih hin kan ngeihmi caan chungah hlim ni le lawmh ni caan cu um ko. Sihmanhsehlaw kan donghnak ni nih a kan hngak cio ko. Khual tlawng pa nih ni khatkhat ah a inn a phanh than lai bang kan i thawknak lei ah a kir than te ding kan si. Cucaah ah nihin a nung ttimi hna zong hi tu hnu kum 150 hrawngah cun ahohmanh vawlei ah hmuh dingmi kan um te lai lo.

Vawlei hmun le caan kan kaltak hnu cun kan caah ri khiahmi caan a um ti lai lo i a hmasa le a hma hnung ti thleidan khawh zong a si ti lai lo. Zungzal timi caan chungah kan um cang lai. Sihmanhsehlaw zeibantuk thil umtuning chungah dah kan um lai ti cu nihin kan nun ning nih bia a chim te lai. Nihin ah Bawipa bochan in a nungmi hna nih cun Amah sinah zungzal in a nung te lai. Bawi Jesuh cu an caah "Alpha le Omega" an hram thawknak le an donghnak a si te lai (Biathlam 21:6).

Cucaah minung cu aa tet ngaimi le tawi ngaimi caan chung kan um. Kan ngeihchunmi caan te hi a tlawm. Bible nih cun "kum 70 asiloah kum 80 a si" a ti. Cucaah kan ngeihchun te hi biapi ngai a si. Sam catialtu pa zong nih "kan dam chung ni hi a rel zia kan thiamter law cuticun kan fim deuh hnga" (Sam 90:12) a ti.

Caan nih hin amah tein um zia a ngei lo. A hmang thiammi caah le a relzia thiammi caah a si. Cucaah kan ngeihchunmi caan te hi Pathian duhpiakmi tuahnak caah hman thiam kan herh. Cun Bawipa he lentinak caah hman ding a si fawn. Kan duhmi vawlei thil tuahnak lawngah kan hman ding a si lo. Kan thlarau caah cun nihin hi a biapi tuk.

Vawlei hi Bible nih a hmun lai lo tiah a kan cawnpiak. Kan hnulei Kum 2000 hlan deuh lioah khan Paul nih "vawlei hi atu bantuk in can sau a um lai lo" a rak ti cang (1 cor 7:31). Cucaah hi vawlei hi a hmasa hrim in zungzal hmun lo ding in ser a rak si ko cang. Bawi Jesuh zong nih "van le vawlei cu a rawk lai, ka bia tu a hmun lai" a ti. Cucaah vawlei hi ni khat ahcun a rawk te lai. Kan dam lio caan ah a rawk lo hmanh ah kanmah tu cu kan rawk hrim lai. Cu rawknak lam pakhat khat lei ahcun caan nih rang tuk in a kalpi.

Vanlawng cungah thut in nuamte in cauk rel le phone tuai menmi hna ca ahcun zei tluk in dah kan i citmi van lawng hi a ran ti theih khawh a si lo. Thlalangawng in a lenglei zoh lawng ah theih khawh a si. Cu bantuk in kan vawlei khua caan hi zumtu nih thate in kan ngiat a herh. Paul zong nih Rom khua mi kha atu kan caan hi zei caan dah a si cang ti tuaktan in caan he nunti thiam ding in ca a khuat hna (Rom 13:11-14).

Vawlei ah thal caan a um bantukin fur caan zong a um. Chun a um bantukin zan caan zong a um. Cu bantukin nun lio caan kan ngei i nun lo caan zong kan phan te lai. Cu thil cu ahohmanh nih tlaih kho loin caan nih a kalpimi a si. Cu tikah khuaika lam dah kan zulh te lai? zungzal nunnak ah maw zungzal hremhmun ah dah?