DONGVAA KHUA TIPIL KHRIHFABUU TUANBIA

A. Tipil Khrihfabu hmasa hna.

(1). Pu Tluang Kio

Dongvaa khua Khrihfabu cu Pu Tluang Kio le Pi Thlua, Dim, Pu Pa Dawh, Pu Tei Kheng hna nih tipil an innnak in aa thawkmi a si. 

Zei caah tiah tipil Khrihfa kan i thithruainak ah member tlingin cohlannak cu tipil innnak in aa thawkmi a si. Pu Tluang Kio hi Samcin phun Pu Tin Zam le Pi Tuan Hnem hna i fapa a si. Pu Tluang Kio cu 1930 kum ah ralkap a rak a tla nain 1935 kum ah a chuah than. Vanchiat ah fak ngai in a rak zaw i laiphung ningin raithawinak phunphun an rak tuahpiak ko nain a rak dam lo. A dam khawh ti lo caah lungdong in Hakha ah Straight Siangbawi pa sinah an kalpi. Siangbawi nih cun Sehtan nih cun zeitik hmanh ah an damter kho lai lo, zungzal a nungmi Pathian lawng nih an damter khawh lai a rak ti. Cuticun Strait nih a rak zohkhen i a rak dam. Straight nih Pu Tlung Kio cu ca rel thimmi a si caah Bible ca le hla cauk a rak thenh i Khrihfa a hung si. A hnu in Pu Tei Kheng, Pu Pa Dawh le Pu Er Ling hna zong Khrihfa ah an hung lut ve¹. An dih lak in 1940 kum Phaipha (B) civui ah Straight nih tipilnak a rak pek hna. Cuticun tipil Khrihfabu cu an rak dirh. (Hi kong hi catialtu keimah pumpak nih Rev. Za Ling (A) diary ah ka hmuhmi a si)². Pu Tluang Kio cu Pu Rua Lo fanu Pi Thlua Dim he an ni um i cuticun a nupi he Khrihfa an hung si. Pu Tluang Kio le Pi Thlua Din hna nih fapa pakhat Pu Hmung Ceu an ngei.

(2). Pu Tei Kheng 

Pu Tei Kheng cu Khrifabu an dirh tlawmpal ah Hmawngtlang khua ah a pem ve. Pi Ngun Tial he an i um i fapa Pu Duh Rem le fanu Pi Sui Eng an ngeih hna. Vanchiat ah Pi Ngun Tial nih a thih tak. Cu hnu ah Pi Zam Cin he an i um than i Pu Tuan Cung le Pi Bual Eng a ngeih than hna³. 

(3). Pu Pa Dawh 

Pu Pa Dawh zong Khrihfabu an dirh tlawmpal ah Hmawngtlang khua ah a pem ve. Pi Dar Ci he thitumhnak an tuah i fanu pahnih le fapa pahnih an ngeih hna. Cu hna cu Pu Phuan Lian, Pi Ngai Zing, Pu Sang Vel, Pi Mang Dim an si^4. 

 (4). Pu Er Ling

Pu Tluang Kio nih Khrihfabu an dirh kum khat hnih a rauh ah Pu Tluang Kio cu Pu Rua Lo fanu Pi Thlua Dim he an ni um i cuticun a nupi he Khrihfa an hung si. Asinain van chiatnak ah Pu Tluang Kio nih a rak thih tak hna. Cun Pu Tei Kheng, Pu Pa Dawh le Pu Er Ling hna zong Hmawngtlang ah an rak pem. Pi Thlua Dim zong hawi a ngeih ti lo caah laiphung ah a rak kir than. Asinain Pu Er Ling cu Hmawngtlang ah sau um loin Dongvaa ah a rak kir than i Khrihfabu cu a rak tharchuah than. Cuticun pehzulh in Khrihfa cu an hung karh.

Pu Er Ling hi vawlei lei theihhngalhnak zong a ngeihmi a si. Dongva khua ah leikung a rak tuah hmasatu zong a si lengah misur te hna zong a rak cing hmasatu a si. Voikhat cu khua ah zawtnak thalo tlangrai fak ngaiin a rak tlung. Cu lioah Pu Er Ling nih thinghnah phunkhat sii caah a rak tuah i thla a camnanh hnu ah a rak dinter hna i an rak dam dih. Cu hnu cun Khrihfa member an rak karh ngai. Amah thithruainak in Biakinn zong an rak sak nain khua uk bawi nih mahka hmun cu khuapi kan raithawinak hmun a si tiin a rak thehter than hna. Pu Er Ling cu 1968 kum ah Kalay ne Tayagone ah a pem i 1981 kum ah Pathian sinah aa din. Pu Er Ling cu fapa pali le fanu pahnih a hrin hna. Cu hna cu Pu Ram Luai, Pu Lian Kip, Pu Thawng Bik, Pu Ci Hnin, Pi Ting Par le Pi Hniang Sung hna an si⁵.

B. Dongvaa Tipil Khrihfabu rak zohkhenhtu 

A hmasa ahcun Hakha Area Baptist Churches ah kan rak um. Cu lioah Hakha Baptist Churches cu Chuncung, Hakha khuathar, Mangnu, Hakha Baptist Church (Lung Biakinn) Khuabe le Beute, Cawbuk, Loklung, Lichia, Kuhchak, Buanlung, Dongvaa kan rak si. Zohkhentu Pastor cu Rev. Sang Ling a rak si. Asinain Hakha Baptist Association January 31-Feb.1, 1958 kum Khuabung civua ah Rev. Huat Kham Ordination halpiak le halpiak lo kong ah Hakha Area Baptist Churches hna cu upa pawl an ruahnak a rak ikhah lonak in thenhnih ah kan rak ithen. Thenkhatnak cu Hakha Baptist Church le Mangnu an rak si i thenhnihnak cu Chuncung, Hakha khuathar, Cawbuk, Loklung, Lichia, Kuhchah, Buanlung, Dongvaa, Khuabe, Beute an rak si. Pastor ah Rev. Lal Hnin a rak si⁶.

(1) Rev. Sang Ling

 Rev. Sang Ling cu 1914 kum ah tang 7 awngmi a si. 1916 kum ah raisekhan chun rian a tuan hnuah vuanthawk zungah cazipi rian a tuan than. 1918 kum ah Cope Siangbawipa le Carson siangbawipa nih Pathian riantuan dingah an sawm i pastor cu July 1, 1918 ah an rak pek. Pastor rian kum 35 ringlo a rak tuan hnu ah December 13, 1953 ah Pathian sinah aa din. John Son Siangbawipa nih cun “Rev. Sang Ling cu bawiphun a si i biapi ngiami a si. Hakha Tipil Khrihfabu nih upat ngaimi pastor a si caah khuakhan lairelnak ah khan a bia chimmi hma a kal ngaimi a si” a rak ti. Amah cu Hakha peng Khrifabu zohkhentu a rak si. Cucaah Dongvaa tipil Khrihfabu cu 1940 kum in dirhmi a si caah Rev. Sang Ling zohkhenmi tangah kan rak um hmasa⁷.

(2). Rev. Lal Hnin

Rev. Lal Hnin (Biakto pa) cu 1915 kum ah thantlang ah a chuak. Kum 14 a si ah Strait Singbawipa nih tipil a pek. Falam ah tang 7 a awn le cangka in Primary Assistant teacher rian a tuan. Kum 5 a tuan hnuah cachimh rian in aa phuak i 1943 kum ah Cherrapunyi Theologycal Colleg, India, ah Baibal ca a cawng. 1946 kum ah Rev. Sang Ling bomtu Assistant pastor ah Hakha Area Baptist Churches nih an lak. 1949 ah dotlaknak ordinatin an pek. 1953 kum ah Rev. Sang Ling cu a thi. Cuhnu in Rev. Lal Hnin cu Hakha Baptist Church ah lutlai pastor a si. September 1958 kum ah Hakha Area Baptist Church cu aa then caah Hakha khuathar Area Baptist Churches ah lutlai pastor a si. Cucaah amah nihcun Dongvaa Khrifabu tiang a rak kan zohnak cu a si⁸.

(3). Buanlung Area Baptist Churches

Hakha Baptist Association nih Chungchung tipil Khrihfabu le Hakha khuathar tipil Khrihfabu hna cu local church an rak pek hna. Cu ruangah Hakha khuathar Area min kha an rak hlawt i Januaaary 31, 1970 kum in Buanlung Area Baptist Churches tiah min an rak auhnak a si. Buanlung Area Baptist Churches cu, Khuabe le Beute nih Hakha Baptist Association ah an lut. Cuhnu in Kuhchah nih Zophei Baptist Association ah an lut. Cawbuk le Loklung nih Local church an lak ve caah nihin ah cun Vanmual kuathar le Buanlung lawng an tang cang⁹. Dongvaa Baptist Church cu Senthang peng chung ummi Tipil Khrihfabu hna nih 1991 kum ah Senthang Baptist Association tiah min pek in a dangte in an rak chuah ve. Cu tikah Dongvaa Tipil Khrihfabu zong Senthang Peng chung ummi le kan miphun hawite an si caah kan lut ve. Nihin ahcun Local Church in SBA ah aa pehtlaimi kan si.

Dongvaa Tipil Khrihfabu hi biaknak lei in Senthang Area chungah a rak um bal lo. A ruang cu Siangbawite nih Senthang peng khua 26 le Zotung peng 46 hna kha Rev. Za Ling (A) zohkhenh dingah tuanvo an rak pekmi a si. Cucaah Rev. Za Ling (A) cu 1933 kum ah Sakta khua ah an rak chiah i Senthang peng Khrihfabu le Zotung peng Khrihfabu 72 kha a rak zohkhenh hna¹⁰. Dongvaa Tipil Khrihfabu tu cu Hakha Area ah fonh chih kan rak si. 

1940-2018 tiang Dongvaa Baptist Church ah chairman a kan tuanpiakmi hna cu a tanglei bantukin an si.¹¹ 

1.     Pu Tluang Kio                  1940-1942

2.     Pu Er Ling                         1943-1948

3.     Pu Hram Hmung              1949-1979          

4.     Pu Ral Cung                      1980-1987

5.     Pu Phun Zam                    1988-1990

6.     Pu Chia Dun                     1991-1992

7.     Hmung Ceu                       1993-1995

8.     Ngun Zam                         1996-2001          

9.     Zai Er                                 2002-2004

10.   Ngun Zam                         2005-2009

11.   Lian Tu                              2010-2015

12.   Bual Dun                           2016-2018

C. Dongvaa Baptist Church cantling riantuantu hna. 

(1). Rev. Tluang Hmung

Rev. Tluang Hmung cu Pu Khua Khia le Pi Dar Hlei hna i an fapa pathumnak a si. Buanlung Area nih kum 1971-1975 tiang Falam Bible singinn ah an rak kaiter. 1975 kum in Buanlung Area Baptist Church ah riantuan hram a rak thawk. 1977 kum ah HBA nih ordination an rak pek. January 2,1984 kum ah a kan thih tak. Rev. Tluang Hmung cu Pi Sui Hning nih Pi Hlawn Meng, Pu Biak Peng le Pi Dawt Nawn Sung an ngeih hna ¹².

(2). Rev. Za That 

Rev. Za That cu tleicia Pu Sui Mang le tleicia Pi Par Iang hna i fapa panganak a si. Kum 1982-1986 tiang Falam Bible sianginn in Dip-Th a dih. 1987 kum chung Dongvaa Baptist Church ah pastor rian a tuan. Kum 1988-1990 tiang Loklung Baptist Church ah Pastor rian a tuan. Kum 1990-1992 tiang Hakha Baptist Association ah E&M secretary rian a tuan. Kum February 22, 1992 HBA-BM meeting Zokhua ah Ordination a hmu. Kum 1992-1994 ah affiliated of Serampore College, Aizawl India in B-Th a dih. 1995-1998 tiang Dongvaa Baptist Church ah pastor a tuan than. Kum 1998-2001 tiang Senthang Baptist Association ah General secretary rian a tuan. Kum 2002-2004 tiang Dongvaa Baptist Church ah pastor rian a tuan than. Kum 2004-2010 tiang Chin Baptist Convention Falam ah E&M assistant director rian kum 6 a tuan. Kum 2010-2012 in Senthang Christian Fellowship, Malaysia ah Fellowship pastor rian a tuan. Kum 2013 chung kawlram ah chitchat a kir hnu ah kum 2014-2015 tiang Dongvaa Christian Fellowship, Malaysia pastor le Senthang Christian Fellowship honornary pastor rian a tuan. 2015-2018 tiang Malaysia Senthang Christian Fellowship ah senior pastor rian a tuan than. Senthang Christian Fellowship ah senior pastor rian a tuan pah in Malaysia Chin Christian union ah Chiarman le Alliance of Chin refugee Malaysia ah chief advisor rian siseh, Malaysia CNF Committee advisor rian hna a tuan chih (Malaysia Chin Christian Union cu fellowship 30 leng a si). Kum 2018 ah Western Australia Perth a phan. 2020-2022 Board member (Chin Migrant Centre, WA) le 2020-2022 Advisor (Chin Community of Western Australia) rian a tuan lio a si.

Rev. Za That cu Malaysia aum chungah Malaysia Senthang Christian Fellowship, Malaysia Chin -ZZLMS family le Alliance of Chin refugee, Malaysia hna nih lunglawmhnak roca (Certificate of Appreciation) an pek. Cu lengah kum 2000 lio ah Myanmar Council of Churches nih Leadership skill certificate an pekmi asi. Cu lengah Malaysia aum lioah part time sianginn a kai pah i “Certificate in spoken and written English” le Australia ah spoken and writing English course level 3 tiang a kaimi a si. Cu lengah “Khrihfa innchung khar”, “Pathian chawkengtu”, “Hlawhtlinnak” le “Tipil Khrihfabu lamtluan” timi cauk le Rev. Dr Simon Pau Khan En nih MehtatamanMagazine ah article tialmi “Baptist tlaiteng” hna zong amah nawlpeknak in a lettu a si. Rev. Za That cu kum 1990 ah Pu Hmung Ceu fanu Pi San San he thitumhnak an tuah i fapa pali Thla Peng, Biak Cin Mang, Thawng Tha Len le Cung Bawi Lian an ngei hna. 

(3). Rev. C. Ram Ceu 

Rev. C. Ram Ceu cu tleicia pu Chum Ling le Pi Kawi Nawn hna i an fapa upa bik a si. Tanghra tiang a kai hnu ah 1994-1998 tiang Chin Christian Collage (CCC) Hakha ah Bible sianginn a kai.  1998-2001 tiang Dongvaa Baptist Church pastor rian a tuan. Kum 2001-2007 tiang Senthang Baptist Association ah Youth secretary rian a tuan. Kum 2005 SBA- BM meeting Dumva ah ordination an pek. 2008-2012 tiang Dongvaa Baptist Church ah pastor rian a tuan. Kum 2013-2019 tiang Senthang Baptist Association ah E&M secretary tian a tuan than. Cu hnu ah nihin tiang Dongvaa Baptist Church pastor a kan tuanpiakmi a si. Rev. C. Ram Ceu cu hla phuah thiammi le solfa tiam ngaimi pakhat a si. Rev. C. Ram Ceu cu kum 1999 ah Khuabe khua mi Pu Hre Hmung le Pi Ni Tlem hna i an fanu Pastor Ni Tin Par he kutsih thut umnak an rak ngei¹³. 

(4). Pastor Thla Pen

Pastor Thla Pen cu Pu Hei Tu le Pi Kut Sung hna I an fanu a si I fimthiamnak lei tanghra tiang a kaimi a si. Kum 1999-2003 tiang Dongvaa tipil Khrihfabu nih Chin Khristian Collage (CCC) Hakha Bible sianginn  an kaiter. Sianginn kai a dih in Khrihfabu nih hlawhleng (volunteer) in kan hman. Kum 2005 ah SBA-BM Baptist Church ah pastor rian a kan tuan. Kum 2007 ah Loklung khuami Pu Hram Kar le Pi Bual Cuai hna i an fapa Tluang Lian Thang he kutsih lehthahnak an tuah i Ram Hnin Thang, Flina Ni Hnem Tial le Clofford Van Tha cung an ngeih hna. Kum 2007-2009 tiang SBA ah Youth Secretary rian a tuan. Kum 2009-2011 tiang Loklung Baptist Church ah pastor rian a tuan. Kum 2011 ah a va umnak Malaysia ah a kal. Malaysia in USA ah a lan i tu hi USA ah an chungkhar in khua an sa ¹⁴. 

(5). Pastor Ceu Kung

Pastor Ceu Kung cu Pu Lian Tu le tleicia Pi Tluang Sui hna i an fapa a si. Amah cu Dongvaa Baptist Khrihfabu nih CCC Hakha ah an kaitermi a si. Kum 2012 ah B.Th digree a kan lakpiak. Kum 2013 in Dongvaa Baptist Church ah cantling rian a tuan. Kum 2016 ah SBA nih pastor sinak an pek. Nihin tiang Dongvaa Baptist Church ah cantling Pathian rian a tuan¹⁵.

Cherhchanmi cauk

01. Dongvaa Khua tuanbia hran p. 44

02. Rev. Za Ling A diary

03. Dongvaa khuatuanbia hran p. 44

04. Abid p. 44

05. Abid p. 44

06. Hakha Tipil Khrihfabu tuanbia p. 98

07. Hakha Tipil Khrihfabu tuanbia p. 93

08. Hakha Tipil Khrihfabu tuanbia p. 95

09. Buanlung Area record

10. Rev. Za Ling (A) tuanbia

11. Dongvaa khua tuanbia hran p. 45

12. Dongvaa khua tuanbia hran p. 46

13. Dongvaa khuatuanbia hran p. 47

14. Abid pp. 47

15. Abid pp. 47