HMAI AH KAL DEUH HNA U SI.

Phi. 3:12-16

“Atu kan phanhnak hmun hin hmaiah kal deuh hna usi” timi hi vawlei thanchonak caah cun a herh lem lo. Zeicahtiah pumpak in siseh, khuatlang in siseh hmailei kan thancho khawnak hnga zuam cio a si ko. A sinain pathian biaknak leitu cun kan phaknnak hmun in hmainor kan hau.
Zeicahtiah zumtu a timi cheukhat cu hmailei ah nor siloin hnulei tu ah kan kir deuh tawn. Cucaah biaknak lei in kan herh khunmi a si. Tahchunnak ah ngakchia hna khi nifatin an thiamtharmi tete he a thangchomi an si. Cu bantukin kan fale kan hmuh tik hna ah kan i lawmhnak bik cu a si. Thla fatin thiamtharmi he an thang. Kan fale hna hi zeihmanh thiam tharmi ngeih loin um sehlaw nan ngeih a chia cio lai. Zeicahtiah a hawi le nih thiam tharmi tete he an tlawng an leng lai. Asinain nangmah fa cu zei hmah thiam chapmi ngeih loin a um ahcun ngeihchiat loin na um lai lo. Cu bantukin kan nih zong pathian hmaiah ngakchia bantuk kan si ve. Zumhnak in kar kan hlannak ah nifatin thiamchapmi le Pathian caah tuahchap khomi kan ngeih ding a si.  Cu lo ahcun Pathian ngeihchiattertu kan si ve lai. Cucaah zumtu nun hi van phanh tiangin a thang ding kan si. Khrih ah tlamtlin tein kan thancho ding a si.

Cucaah Paul nih a chimmi hi phun 4 in chim kan duh.

1. “hi thil ah hin ka hlawh a tling cang ti a si lo i ka tling cang ti zong a si fawn lo”. Paul kha damaska pawngah ceunak nih a cerh i a tlu Saul nih hodah na si Bawipa a ti i aw nih cun na hrem lengmang mi kan si a ti. Saul he a kalti mi hna cu aw cu an theih nain a mui an hmu lo.  Tuchan ah hin Paul bantuk in testimony ngei hi vawlei ah an um lai ka zum lo. Mah kong hi Paul zong nih i phorhlawpi sehlaw a palh lai ka zum lo. A sinain a chim bal lo. Voihnih te cu a chim nain a thei bik le a hngal bik bantukin a chim lo. Kan nih kan ram ah kan tlarau nun a than khoh lonak cu a bik si kan duhnak hi a si. Thlarau mi ka si kan ti. Mi nih hmuh lomi a hmu bantuk in kan chim. Mah nih kha zei dah a langhter ti ahcun Jesuh hi kan hmuh ning ding nakin kan hmuh lomi a tam deuh ti langhtertu a si. Paul cu a hmuh ciami nakin a hmuh lai dingmi a tam deuh ti  a hngalh caah ka hmuh dih cang ka theih dih cang a ti ngam lo. Cucaah cu thil cu ka ta a si khaw nakhnga ka zuam a ti. A hmuhmi kha a ta a si khawh zungzal nakhnga a zuam. Mah kha a than liannak hram cu a si

2. “hnulei thli philh in”: Paul nunnak kan zoh tikah Greek nunphung zultu a si. Rom miphun sinak a ngei. Judah miphun sinak le biaknak lei upa a si. Cuarpar aa tanmi a si. Chuahkehnak lei in Judah mi, Benjamin phun, Hebrew mi thianghlim a si.Abrahma tefa a si. Gmaliel kuttang ah ca a cawngmi sinak. Cu a sinak pawl nih cun Pathian lei ah hmai ah a kalter kho lo. Hnulei a sinak kha Pathian lei karhlannak donkhamtu a si.  Asinain Pathian dawtnak a hngalh khawh in cu a sinak vialte cu tangah a thumh dih. Hnulei a sinak vialte kha a philh dih. 

Paul cu Pathian rian a tuannak ah hremnak phunphun a tawng. A sinain philh a tim. Judah le Rom ral a tonnak vialte kha phorhlawtpi  dingin a ruat lo. Ka philh dih a ti. Kan ram ahcun hnulei kan tuah cio mi hna nih kan hna a ngamtermi kan tam. Mi sinah kan i phorhlawtpi tuk. Kan chimrel khawhnak, kan pek tamnak le upa rian kan rak tuan cianak hna nih kan hna a kan ngamter. Cu bantukin thil sual kan rak tuah sualnak le mi sual kan rak si balnak hna thinlung chungah camter peng zong hi hmailei karhlannak caah donkhamtu a si. Cu bantukin hlan i mi hlim sinak le thlaraumi rak si balnak kong a chim tamtukmi hna zong hi an thlarau a thang lian kho lo. Khrihfa hla buu kan sakmi ah “hmasa kan dawtnak in atu ah kan dawt deuh” tiah kan sak. Asinain nihin kan nunnak taktak cu atu nakin hlan ah kan dawt deuh tiin hla a sami bantuk nak si.

3. “hmailei thil banh in ka zuam”:  Paul cu kan hngalh bantukin Thlarau thil pek a co (1Kor. 12:8-11) Fimnak biachim thiamnak, zumhnak ngeih, Mizaw damternak, khuaruahar tuah khawhnak, Pathian bia chim thiamnak, Thlarau sinin a rami a si maw si lo ti thlendan khawhnak, Holhtheihlo chim khawhnak, Mah vialte hi Paul nih a ngeih dih ti a si. Cu lengah cakuat tial thiamnak, Khrihfabu dirh khawhnak, hna a ngei. Asinain cu thil vialte a tuah khawhmi cu “ka tling cang a ti lo” (Phi. 3:12) hmailei thil banh in ka zuam a ti. 

Paul cu Pathian nih a caah a tuahpiakmi a tamtukmi a hngalh tikah amah nih bawipa caah a tuah khoh lomi thiltampi a hmu ve. Cucaah a Khrifa sinak kha a hramthawk ka bantuk ah a ruat. Lk 17:10 ah kan hmuhmi cu “kan nih cun sal santlai lo kan si, kan tuah awk hnga rian a simi lawng pei kan tuah ko cu va ti u” a ti. Indea ram i mission rian a tuan hmasa tu kha William Cary a si. Amah cu indea ram holh phun 38 in Bible ca a lehpiakmi hna a si. Nihin tiangah Bible sianginn kip nih a kong cawn a si. Missionary lar takmi a si. A nun lioah amah tein a thlanlung tial dingmi ca a tial. A tialmi cu “kei na caah santlai lo fekmi na zaangfahnak in na sinah ka ra)” a ti.

4. “zei a si hmanh ah, atu tiang kan zulhmi phung ningin hmailei ah kal ko u sih” Khrihfa nih kan zulhmi phung nih hin tinhmi a ngei. Cucu Pathian pennak chung luh kha a si. 

Cu bantukin Khrihfa kan sinak ah zei bantuk thilti khawhnak kan ngeih hmanh ah cu lawngin a za lo. Kan i tinhmi cu Pathian sin phanh kha a si. Tahchunnak ah football lentecelh a thiam ngaimi pakhat cu zei tluk a thiam zongah a goal lo ahcun teinak a hmuh kho lo. Cu bantukin zumtu hna goal cu Pathian pennak chung luh kha a si. Nihin ah zumtu hna kan phanhnak hmun hi a khat cio lai lo. Kan dir hmun zong a khat cio lai lo. Asinain kan dir hmun cio in nifatin hmailei kan panh deuh ding a si. Tahchunnak in an chim tawnmi cu Khrihfa nun cu Byscle cit bantuk a si an ti. Byscle cu kan i cit i hmailei a kal lo ahcun kan tlu cawlh cang. Cu bantukin zumtu zong hmailei kan kal lo ahcun a tlumi kan si cang. Cucaah ni kum nakin tu kum ah zei dah ka tuah khawh deuh ti hi nihin in kan thawk ding a si. Bible rel kan thawk ding a si. Thlacam kan thawk ding a si. Thawhlawm pek kan thawk ding a si. Pum kan teima ding a si. Kan ti khawh tawkte in kan ni zuam ding a si.

Bawi Jesuh kha Simon nih rawlei a sawm. Cu lioah hlawhhlang nu pakhat a ra. Zihmui cu lio phaisa 300 man a si. Mah kha a khuai i inn chung cu rimhmui in a khat. Zultu hna nih zual sehlaw misifak then hna she law a tha deuh lai an ti. Bawi Jesuh nih cu an ruatmi cu a  hngalh i ka caah hi numei nu nih a ti khawh tawk in a tuahmi a si a ti. A ti khawh tawk kha a lawmhnak bik a si. Nan sin i ka um lioah a tuah. Sifak cu nan pawngah an um zungzul ko lai a ti hna. Cucaah a can liote i thil kan tuah lo ahcun Jesuh nih kaltak khawh a si. D.L Mudi nih mah nu kong hi a thlanlung ah tial siseh law “Jesuh caah a ti khawh tawk a tuahtu a si” tiah ka tial lai i vawlei ah thlanlung dawh bik a si lai” a ti.