ZUMTU PAWL NIH NGEIHMI NUN HNANGAMNAK

John 16:33

Kan biatlangpi zoh tikah then hnih ah then khawh a si. Cu hna cu zumtu pawl nih ngeihmi nun hnangamnak le zum lotu pawl nih ngeihmi nun hnangamnak hna an si. 

A. Vawilei nih a chuahpimi nun hnangamnak.

Minung hi nu paw chungin kan chuah le cangka in hnangamnak kawlmi kan si.  Tahchunnak ah ngakchia chuakka pawl khi an chuah le cangka in an tap cawlh tawn.   Cucu an pum chungah zei maw ti in pakhat khat nuam lonak an ngeih caah a si. An rawl maw a tam, asiloah a kit tuk maw, a sa tuk maw, pakhat khat nuam lonak an ngeih caah a si. Cu ruangah cu an tonmi thil ruangah hnangamnak an kawl. Cu bantukin kum upa zong hnangamnak a kawlmi kan si thiamthiam. Nungak tlangval kan si tik zongah kan kawl hmsa bikmi cu nupi le va hi a si. Nupi siloah va kan ton tikah nuam tein kan um cang lai kan ti nain chungkhar tlamtlin lonak ruangah harnak tete a rak um thiamthaim. Fa kan ngei. Nuam tein kan um cang lai kan ti. Asinain kan fale zu an ding. An phohpian. Cu tikah chungkhar cu buainak lawngte a si. Hnangamnak a um kho lo. Chungkhar ah ruah lopi in zawtnak, faknak, thihlohnka, sifahnak phunphun kan tawn.Cu tikah ah hnangamnak kan timi cu a lo than tawn.

(1). Minung kan sinak ah hnangam lonak phunphun a um.

Vawileicung ah miphun tampi kan um. Cu miphun pakhat le khat karlak ah thlennak a um. Miphun fa tete pawl cu khuaika hmanh ah hnangamnak a um kho lo.Eg Chin miphun zoh u si. Chin miphun cu miphun tlawmte kan si. Cucaah kawl nih an kan nautat. Mizo ram ah kan kal. An kan nautat. Malaysia ah kan ra. An kan nautat.  Kan kawl ram zongah miphun nautatnak a tam. Tlangcungmi an kan rem lo. An kan tuk. Riantha an kan pe lo. Siria ram le Irak ram ah buainak tampi a um. Minung tampi an thi. Cucu miphun karlak rem lonak ruangah a si.

(2). Vawlei nih a chuahpimi hnangam lonak.

Mifim pawl nih kanvawleipi hi meh kionak ukang bantuk a si an ti. Cu meh kionak ukang cu a taw leiin meisa in khangh a si. Cu bantukin kan vawleipi hi a um cang i tih a nung tuk cang an ti. A ruang cu vawlei himnak ding caah a hermi minung nih kan chiatter dih cang caah a si.  Cu ruangah khuacaan a hman ti lo. Ruahpi fakpi in a sur. Thlichia a hrang. Meitlang a puak. Cu ruangah vawlei ah hnangamnak a um kho lo. Zamnak hmun zong kan ngei fawn lo.

(3). Minung nih hnangamnak kan kawl.

Minung nih hnangamnak kan kawlmi hi a khat cio lo. Cheukhat nih vawlei chaw le va ah kan kawl.  Asinain kan caah hnangamnak a si kho lo. Kan rum deuhdeuh, kan thinlung a hman lo deuhdeuh. Kan rum deuhdeuh. Pathian he kan ihlat deuhdeuh.  Vawileicung i mirum bik an timi Solomon zong nih “vawleicung thil hna hi pakpalawng lawngte an si dih” a ti. Lk. 12:15 ah “Minung a rumnak ngaingai cu zeitluk in rum hmanh she law thilri men a si” a ti.

Cheukhat nih hnangamnak cu fimnak ah an kawl. Asinain an fim deuhdeuh, Pathian he an ihlat deuhdeuh. Pathian lam in an pial. Pathian nih fimnak a pekmi Solomon zong nih fimnak ah diriamnak a um lo” a ti. Cheukhat nih zuu le sa ah an kawl. Zuu an ding deuhdeuh, nuamhnak le thinlung hnangamnak an hmu lo. Zu tam deuh an din ah buainak le ralnak lawngte a chuah. Cucaah hruhnak lam tu an zulh a si ko. Cheukhat nih hnangamnak cu nungak le tlangval ah an kawl.  Tlangval pakhat hnu pakhat in an tleng. Nungak pakhat hnu pakhat an i thleng.  Asinain hnangamnak an hmu lo.  Solomon Siangpahrang pa zong nupi 700 a ngei. Asinain a nupi le hi hnangamnak petu an si lo. Siasal Biaknak tu an chuahpi i an ram buainak lawngte tu a rak si.

Zumtu pawl nih ngeihmi nun hnangamnak.

Chin miphun Khrihfa kan rak si hlan ah, kan thinlung chungah tihnak lawng in a khat. Khuachia kan tih. Khuavang kan tih. Hnam kan tih. Minung kan tih. Kan khua a silomi miphun dang kan tih hna. Kan Biaknak zong kan sinah harnak a phakter sual lai tiah a thinhun lai tih ah kan biak. Kan pathian sin thil kan pekmi zong kan tih caah kan pekmi a si. Cucaah kan Biaknak nih thinlung hnangamnak a kan pek lo. Asinain kan Chin ram ah thawngtha bia phun in a rak um hnu cun, tihnak le phannak vialte a lo dih. Hlan ah huham a ngei (power) tiin kan ruatmi pawl cu huham ngei lo (powerless) ah an cang  dih. Kan nunnak ah huham ngei (Power) cu Khrih sin in a rami a si. A ruang cu zumtu nih kan ngeihmi nun hnangamnak cu Pathian sinin a rami a si.  Cu hnangamnak cu zumtu nih kan ngeihmi nun hnangamnak cu a si.

Zumtu nih kan ngeihmi nun hnangamnak cu zei bantuk dah a si.

Zumtu nih kan ngeihmi nun hnangamnak cu paul nih phundang piin a chim. Paul nih “hnangamnak ngaingai cu ngeihmi chungin lungsi hnangam ziathiam kha a si” a ti. Phi. 4:12 ah “ka paw ka khim ah siseh, ka rawl a tam ah siseh, ka rawl a tam ah siseh, tlawmte ka ngeih ah siseh, tampi ka ngeih ah siseh, lungsi hnangam tein um zia ka thim a ti. Bawi Jesuh zong nih Mtt. 6:33 chungah “phaisa hi duh tuk hlah u; van in a zuangmi vate hma rian an tuan tung lo, Pathian nih a cawm ko hna. Ccaah zeidang nakin Pathian pennak le zei dah tuah hna she ti a kan duhmi kha ruat u law thil dang vialte cu an pek thiamthiam ko hna lai” a ti. Chim duhmi cu Phaisa duh tuk cu Pathian pennak he a kaih lo tinak a si. Mtt. 20:1-16 chung zong ah Jesuh nih Pathian pennak he a kahimi thil umtuning a chimfiang. Cu lungput cu ngeih a haumi a si. 

Pathian sin in a rami a si.

Paul nih hi tin a chim. “Pathian kan pa le Bawi Jesuh nih daihnak in pek hna she. Kan Bawipa Jesuh Khrih i a Pa le a Pathian, zeizong vialte ah a kan bomtu Pathian cu thangthat u” a ti (2Cor. 1:3). Chim duhmi cu Pathian cu hnangamnak le daihnak Pathian a si tinak a si. Paul nih Thesolonica cakuat ah “Lunglawmte in um zungzal ko u” a ti. Voikhat cu Jesuh le zultu pawl khual an tlawn lio ah tilet a tho. Zultu pawl cu an khuaruah a har. Kan thi dih cang lai an ti. Cu lioah Jesuh kha an sinah a ra. Thilchia cu a sik hna i an dai cawlh.  Hnangam tein an um than.

Thlarau Thianghlim pekmi a si.

Bawi Jesuh cu thihnak in a thawhthan hun ah van ah a kai lainak kong a chim. Zultu pawl cu an ngeih a chiatuk hringhran. Cu ruangah anmah le rian ah an kir dih than. Cu tikah Bawi Jesuh nih hi tin a chim “kapa sinah ka hal lai i bomtu dang an pek hna lai i zungzal in an umpi hna lai” “John 14:16) a ti.  Ni 50 hnu ah Petecost ni ah Thlarau thianghlim a phan. Cu hnu ah zultu pawl nih hnangamnak an hmuh than.