THLUACHUAHNAK PHUNHNIH.

Mtt. 5:45, Deut. 28:1-2, John 2:8-9

Thlachuahnak kan timi hi, Pathian bia nih a chim duhmi le minung nih kan ruahning a dang tawn. Minung nih cun vawlei cung chawnva le sui le ngun hna kha thluachuahnak a si kan ti kho men.

 Cucaah cu thil fiang tein kan hngalh khawhnak ding caah, thluachuahnak a ratnak hi kan zoh hmasa lai. Thluachuahnak a ratnak hi lam hninh in a um i pakhatnak cu chunglei, Pathian sin in a rami a si. Pahnihnak cu  lenglei, vawlei in a rami a si. Fiannak in chim ahcun, Adam thluachuahnak in a rami a si. Cucaah thluachuahnak kan timi hi, vawlei in a rami le Jesuh in a rami tiah chim khawh a si. Gen. 3:17-19 chung i Adam thlachuahnak hi Pathian bia in a rami a si ko. Asinain Adam thluachuah cu, thlan chuah in riantuan ding, semrial tein nunnak ding a si. Cucaah huam lo kha Adam thluachuah he a ra chanmi a si. Minung cu Pathian bia ningin riantuan ding a si. Zei tindah mi ka hlen lai i a lak in ka hmu lai, ti lawngin ruat cu Pathian nih a duh lomi a si. Cun, hlepruk in nun hna cu, Pathian nih chiat a serhmi a si. Cun 10/1 fiarmi te hna zong hi Bawipa duh lomi a si.

Adam thluachuahnak cu teirial tein riantuan le semrial tein nun in a rami a si kan ti cang. Cucaah vawlei kan nun chung cu fakpi in rian kan  tuan ding a si. Nihin ah Malay ah ruahchannak nganpi he kan ra. Asinain Malay ah kan lung a rawk dih cang. Malaysia hi kan duh zat in kan um kho ti lai lo. Cucaah kan um liote ah hin fakpi in riantuan in semrial tein kan nun a herh. Malay cu fel tein rian kan tuan ahcun phaisa hmuhnak a tha ngai rih ko. Asinain cuti si loin zu kan din ahcun zei hmanh na tuah kho lai lo. Bible ah zuding hmasa cu Noah a si. Zu a ri. Cu lioah Ham nih a sawh. Cucaah Ham cungah a thin a hung i chiatserhnak a tlung. Lot umnak Sodom khua zong kha zu le sa in an i ciah i sualnak phunphun an tuah caah Pathian nih kat mei in a hrawh. Lot cu zuu a rit lioah a fanu le pahnih nih an sualpi. Cuticun Lot nih a fanu le  cungah lakfa a hrin. Cucaah zuu nih hin that lonak phunphun a chuahpi. Cucaah zuu din  loin riantu fakpi kan tuan ding a si.

Adam thluachuahnak cu Mtt. 5:45 chung bantuk a si. "a thami he a tha lomi he an cungah a ni kha a tlanter i thatnak a tuahmi he that lonak a tuahmi he an cungah ruah kha a surter". Adam hrinsor vialte zumtu he zum lotu he rian a tuanmi cu thluachuah an hmunh dih. Phi 4:19 chungah Jesuh a kan pekmi thluachuah cu buaktlak thluachuah a si ve tiah kan hmuh. Asinain Jesuh chungah Pathian nih a kan  chiahpiakmi thluachuah cu amah a zummi hna caah a si.

Bible nih thluachuahnak hi kawl u a ti lo. Pathian nan zumh ahcun thluachuahnak nih an zulh hna lai a ti. Eg. Minung kan thla a dawimi si loin kan thla tu nih a kan dawimi bantuk khi si. Thlachuahnak taktak cu Jesuh a si. Thil dang hi cu laihpuai a si. Laihpuai lawng kan ei khawh a si lo. Laihpuai a umtertu cu rawl na cawkmi ruangah a si. Jesuh na ngeih hmasa a hau. Cuti na nunnak ah Bawi Jesuh he a umtimi nan si ahcun, thluachuahnak nih an zulh chih ko lai. Hawikom tha innpa tha na ngeih khawhnak dingah Jesuh ngeih hmasa a hau. Eg. ziru (O) hi mi hnu te a.zulhmi a si ko nain man ngei ah a  cang. Na umnak a hman ahcun na man a kai lai. Tu le maheh khi ramlak ah cun man a tlawm. Raithawinak caah na hman ahcun man tampi a ngei cang.

Cucaah thluachuah pahnihnak, Jesuh nih pekmi  cu tuan len zongah a si lo. Eg. Peter sur a vorhmi kha zoh tuah. Zan khua dei a vorh ko nain a tlai lo. Jesuh he an i tawng i “nangmah nih vorh na ti ahcun ka vorh ri ko lai” a ti hnu lawngah nga tampi a tlai kho. Nga tamtuk an tlaih caah, lawng hmanh a pil hnih.  Pathian bia  chungah thluachuahnak a um. Abraham le Lot kong zoh. Abraham nih Lot cu a duhmi a thimter. Pathian nih auhmi cu Abraham a si. Asinain Abraham nih a naupa Lot cu a duhmi ram aa thimter. Abraham nih a fianmi cu thluachuahnak cu, hmun le ram he a pehtlaimi a si lo ti kha a si.  Lot nih zei theih loin a duhmi ram aa thim. Asinain Sodom khua cu van in a hnu ah katmei a tla. Asinain Abraham umnak cu thlachuah ram ah a cang. Cu bantukin Jecop fapa Joseph kha an zuar i saltannak Ezip ram a phan. Asinain a umnak hmu paoh thluachuah a phan. Thong chungin siseh, Thonginn lengah siseh, Ezip ram i a umnak hmu paoh cu thluachuahnak a phan. A U le umnak thluachuah ram cu mangtam a tlung. Cucaah Joseph umnak ram ah pur an rak phir.

Cucaah Pathian biatak ah kan um lo ahcun, ram thumnak cu chim lo, ram ngannak  hmanh um law zei hmanh na si lai lo. Jesuh he na um ahcun khuate hmanh ah um law na rum ko lai. Jesuh he na um lo ahcun nun mangtam na tawng ko lai. Pathian fale thluachuah hmuh hi Pathian nih a duh tuk. Israel miphun Ezip ram an chuah lai ah an sui le an ngun na hal hna lai tiah Jehovah Pathian nih a ti hna. Faro le a mi hna nih, Pathian nih khuaruahharnak a tuahmi kha an tih i fawi tein an pek hna. Asinain thla 2 a rauh hlan ah moses nih nawlbia a lak lioah Aron kha sui cawfa milem serpiak dingin an nawl. Ezip ram i man loin an hmuhmi vialte an sui le ngun hna cu sui cawfa lem sernak ah an hman dih. Cu ruangah Moses a thin a hung tuk.

Pathian bia hi kan zumh ngamnak chungah thluachuahnak a um. Minung 5000 rawl Jesuh nih a dangh lio hna kha, Jesuh nih thla a cam. A photter hna. Zultu pawl nih an phot ngammi kha khuaruah har a si. Hruh phunkhat cu a si. Zei ruangah nga pahnih le chang panga kha zultu pawl nih an phort ngam. Phaw u timi bia ah an um caah a si. Cucaah Pathian bia nih kan dawi seh kan ti ahcun a bia ah nun le zumh ding kan si ko. Bawi Jesuh nih, Peter kha va kal law nga va sio. A ka chungah phaisa a um lai a ti. Vawlei phungin cun phaisa in nga an cawk tawn. Asinain Peter nih cun nga in phaisa a cawk. A sullam cu Jesuh a bia ah khan phaisa a um. 

John 2:7-9 chung kan relmi ahkhan Jesuh nih Ti kha misur zu hrim ah a caanternak kan hmuh. Cuti khuaruahhar an tuah lio can kha Jesuh amah pumpak in vawlei a um lio a si. Nihin ah cun thlarau in mi kip sinah a um. A hlan ahcun pumsa in a um. Nihin cu a bia in a um cang. Zei ruangah thlarau in a um komi cu sawm a hau?. Chim duhmi cu, hmun pe u sih ka ti duhnak a si. Kan nih cu kan umnak cio ah thlarau kha hmun kan pe lo. Zei paoh rian kan tuan ah timhlamhnak cu ka  ngei ko. A si nain thlarau kan sawm lo. Timhlamhnak ngeih cu a tha ko. Asinain mi thinlung ah nunter khotu cu thlarau a si. Bible zong nih “raltuknak ah a thawhmi ralbawi nih ralkap zei zat in dah ka tuk lai ti kha tuantan hmasa ahau” a ti. 

Hi nupi thitu pa a mualphohnak cu zei zat dah a dih lai ti a tuaktan lo. Bawi Jesuh kha um hlah she law a mualpho tuk lai. Asinain a vanthatnak cu Bawi Jesuh a sawm kha a si. Bawi Jesuh a rak sawm kha cu a fuh thiam bakmi a si. Jesuh kha an thangthat lo. Thangthat cotu cu Jesuh sawmtu pa kha a si. Cucaah kan herhmi petu le theitu cu Bawi Jesuh kha a si. Kan nunnak ah Bawi Jesuh he kan umti ahcun lung rethei ding a um lo. Cucaah  pakhatnak ah Jesuh hi hmasa cem ah chiah ding a si. Kan nih cu, cu bantuk cu kan si lo. Kan herh can lawng ah Pathian kan ti. Parasitmol bantuk kan si. Kan lu a fah lawng ah parasitamol cu kan kawl. Kan lu a fah lo ahcun a kilne ah kan chiah. Mi cheukhat cu zumtu kan si kan ti ko nain Jesuh kha harnak kan ton can lawngah kan auh.

Kan nih cu kan vansan can lawngah Bawipa kan ti. Harnak kan ton hnu lawng ah thlacam kan caam. Daniel kha chendeih thong chung lawngah thla a cam lo. Chendeih thong chung a um hlan ah thla a rak caam cang i chendeih kom chung ah khan cun, a thlacam theipar a zunnak hmuntu a si. A hawi le pathum mei phu chungah an paih hna ah khan thla an cam ti lo. Thlacam caan a si ti lo. An thlacam thleitlai zun caan tu a si. Kan dam lioah hin thla fakpi in kan cam ding a si. Dam lonak kan phak ahcun thlacam khawh a si ti lo. Kan thalcam theipar tu hngak can a si cang. Cutucun Pathian nih damnak thluachuah an pek lai. Ngangamnak na hmu lai.