MIPHUN VIALTE SINAH THAWNGTHA

                                                                                

Bible cherhchan: Mtt. 28:18-19

           Mission riantuannak hi chim tikah mipi nih theih cu an duh ngai.  Asianin anmah pumpak kal cu an duh lo. 

An fa le hna zong kalter an duh hna lo. An fanu le vaa caah siseh, an fapa le nupi caah siseh an duh hna lo. Zeiruangah tiah mission biathli an theih lo caah a si. Mission rian cu Bawi Jesuh nih tuanvo a kan pekmi a si. Cu a kan pekmi rian ahcun rian lawng siloin kan nunnak i a herhmi vialte aa tel chih dih cang. Minung pakhat kha company hmanh nih rian a pek tikah nunnak i a herhmi thil  vialte tuanvo an lak dih hna. Minung hmanh nih cuti tuanvo an lak ahcun Pathian rian chinchin cu, Bawipa nih zeipaoh kan herhmi tuanvo a lak dih lengah thluachuahnak zong a si chih. Asinain kan nih cu, cuti a si lo. Rianpeknak kong Bawipa sinin kan theih tikah zeitindah kan i cawm lai kan ti. Paul nih Rom khua ca a kuatnak hna ah khan, Pathian bia ah zeipaoh thil tikhawhnak a um a ti. Cucu kan thei kho lo.

Paul nihcun thawngtha hi ka thawngtha/ keimah kong (my Gospel) tiah voi 4 a hman. A suallam cu thawngtha kha ngeitu ka si tinak a si. Cucaah nihin ah mission kong ah kan ruatnak hi thleng usi law ka duh. Thawngtha cu Pathian nih kanmah a kan dawtnak kanmah kong kha a si. Zeicahtiah cu kong cu kan sining cio tein midang chimchin ding in fialmi kan si. Israel miphun hruaitu ding ah Moses kha amah sining tein a kawh. A kawh bantukin a herhmi thil vialte kha a pek. Kum 40 chung Canaan ram ah a hruai hna. Nu le ngakchia tel loin minung ting 6 an si. Cu, minung vialte ei ding ah, Chiti, cite, thing tbk tiangin an herhmi vialte a khanpiak hna i ramcar chungah kum 40 chung a hruai hna. Nikhat hmanh rawl ei loin an um lo. An phanah zong a tet lo. Moses le a hawi le lamhruaitu Pathian cu a tak in rian a tuanmi a si.

Pathian riantuan cu Pathian bia zumh hi a hrampi cu a si. Keimah Pathian rian ka tuannak ah thiammi le theihmi, ka ngei lo. Ka ngeihchunmi cu amah bia Bible hi a si. Cu bia ka zumh i ka bochan tikah amah rian ka tuannak ah harnak tete um ko hmanhsehlaw, cu harngak karlak ah Pathian thatnak ka tonmi a ngan deuh tawn. Cucaah Pathian thatnak lakah harnak tonmi hna cu chim tlak lo an si. Pathian rian a tuanmi cu Lk 10:10 ahcun “khuachia thawl khawhnak thawnnak tiang a kan pek” a ti. Mk. 16:25 ah thil tikhawhnak tampi kan hmuh. 2 Kor. 2:14 ah “Pathian nih teinak leiah a kan hruai” a ti. Cu caah Mission rian nih biathup / biathli a ngei. Kan nih cu mission biathup /biathli kan thei kho lo. Cu ruangah lenglei thil in kan zoh i kan tih. David lenglei thil in ral a tei lo. Pathian zangfahnak thawngin CBC mission department ah kum 6 chung rian ka tuan ve. Mission riantuannak ah bomtu tete kan ngei tawn. Cheukhat cu aho a si ti kan thei kho hna lo. Chim awk kan thei lo i Vanmi an si ko lai kan ti. Cu bantukin Pathian riantuannak ah a herh ahcun vanmi bantukin Pathian nih mi a hman ko hna.

Zumtu nihcun Pathian ram kaunak cu kan duh hrimhrim ding a si. Pathian pennak ram kauternak thinlung a ngeilomi zumtu cu lunghrinh awk tlak an si. Nihin ah thildang vialte nakin a biapi deuhmi cu mission riantuan hi a si. Mi nih cu lam cu kan zulh ahcun thluachuahnak a si. Nihin ah Van ah kai usi law Peter le Paul  te hna kha kan ton hrimhrim hna lai. Vawilei nan um lio Pathian rian nan tuan kha a har maw tiah hal hna usi law voitampi cu thih kan duh an ti ko lai. Asinain a har tiah kaltak thiam ding kan si lo. Hlaphuah thiam C. Stubbins nih “hawikom te hmanh sawm loin zeitin hi bangin kai lai” a ti.

Exo 14 ah Israel miphun nih Rilisen an tannak kong kan hmuh. Cuka hmun ah Pathian thawnnak a langhnak zong kan hmuh. An hnulei zoh ah Faro le a ralkap pawl an si. An hmailei zoh ah minung thawnnak nih a tan khawh lomi Rili a um. Cuka hmun ahcun an tap dih cang. Ezip ral nih an thahding hna kha a fiang tuk cang. Minung ruahnak in cun kutthiar in Faro a ralkap pawl kut ah mah tein ap dih a fawite mi a si. Asiloah Ezip ralkap pawl cu doh lawlaw, asiloah mah le tikhawh ning cio in zaamtak lawng a tang cang. Minung thluak nih a tuaktan kho ti lo. Cun anmah nih doh lo ding zaamtak lo ding, kha Pathian mi an sinak in a herhmi a si fawn. Pathian khamhnak lawng kha bochan ding a si. Cu bantuk caan ah Pathian hmuhning le minung ruahning a dang. Hika zawn ah thil aa thupmi pakhat a um. Phundang in kan chim ahcun an luat khawhnak ding lam pakhat a um chunmi a um. Cucu zeidah a si. Thlacamnak a si. Moses le Israel mipi nih Pathian kha an auh. Mi vansang pawl auhnak cu Pathian nih a theih. Israel miphun nih luatnak an hmu.

Mi vansang aunak a theitu Pathian a um. Israel miphun bantukin vawlei ah harnak a tawngmi kan tamtuk cang. Van zoh ah a sang, vawlei zoh ah a pit, i vansang au in a taphrammi kan taktuk cang. Hi hna nih aho dah kan auh lai i aho dah bomhnak kan hal lai ti awk an thei lo. Cu hna bomtu dingah Pathian a um ti kan chim hna a herh cang. Nihin ah zungzal nunnak ngei loin thihnak thlankhor chungah mi vialte an liam cuahmah. An zatlang nunnak ah Pathian dawtnak le zawnruahnak tel loin sifak le santlai lomi hna a namchuhmi an tamtuk cang. Kan vawleipi hi nahchuahnak le ziarngeihnak in a khat cang. Cucaah cu hna sin thawngtha chim hi Pathian nih tuanvo a kan pek. Nihin ah kan Pathian hi zeibantuk Pathian dah a si ti hi zumlotu hna nih an theih a hau cang.

Thawngtha hi tha tein phuan kan i tim ahcun biatak tein tinhtuahnak kan ngeih a herhmi a si. Eg Phazawngdan pakhat ngei law, khuaika ahdah na van lai?. Muihnak lakah na vang ko lai. Muinak ah na van lo ahcun suallam a ngei lomi a si. Cu bantukin thawngtha bia cu aho hmanh nih an chim ballonak hmun ah chimding si. Pathian nih an pekmi na thil ti khawhnak chunte hi Bawipa caah hmang tuah. Muinak ah a ceumi si tuah. Paul zong nih kei ka saduhthah cu aho hmanh nih an chim ballonak hmun ah a ti. Kannih cu mei a ceu cianak ah  kan van. A herh lonak hmun ah kan meiinn kan van caah hmuh lo ding zong kan hmuh dih. Langh lo ding zong a lang dih. Peter cu ngatlaitu a si. Asinain mi tlaitu ah Jesuh nih a thim. Kanmah cio zong minung tlaitu ah Bawipa nih a kan thim. Asinain Sehtan nih a kan tleih kanh dih cang. Kanmah minung tu hi mino, Upa kan zate in Sehtan nih a kan tleih dih cang. William Cary nihcun Bible mit in vawlei hi kan cuanh ding a si a ti. Pathian nihhin ramri a ngei lo. Pathian nih vawlei a dawt ti cu ramri a ngei lo. Minung tu nih ramri kan ngeiter. Vawlei khuazakip ah va kal u a ti. Cucaah hi vawlei hi kanmah kut ah a chiah.

Nihin ah kan zumhnak hi sehtan nih khatlei tivaral ah kai kho hna hlah she ti a duh. Cuti varal kai kho lo dingah a phunphun in tihnak le thinphannak a kan pek. Galali Rili ah zultu pawl lawng in an kal lioah Sehtan nih tivaral an phanh lai kha a duh lo. Cu ruangah thlichia fak piin a hranter. Asinain Bawi Jesuh cu zei nih hmanh kham khawh loin an sinah a caan hmanh tein a ra. Bawi Jesuh nih “tih hlah u” a kan ti. Cucaah raltha tein Bawipa rian kan tuan ding a si.

Pathian riantuan ka thawk ahhin zeihmanh ka ngei lo. Pathian cu a tha. Amah nih a riantuantu hna hi a kan zulh. Kan herhmi vailte a kan pek. Kan tluk sualnak hngalo amah nih a kan tleih. Kan rawl a tam ah rawl a kan pek. Kum 30 chung Pathian rian ka tuan cang. Kaa ruahchan ngam lo tiang in a ka cawisang. Mah kong cu ka chim cawk lai lo. Zeihmanh asilomi hi zei ah a ka ser. Thil hmete zong thil nganpi ah a can ter. Pathian ka zoh lioah ka ral hna, a ka sawisertu hna an tluk kha ka hmuh. Cucaah Pathian nih a riantuan ding in nawl a kan peknak ah hin zei poah kan herhmi a rak um dih ko ti hi a fiang. A bia chungah hin thil tikhawhnak a rak um taktak ko.

Pathian thil ti khawhnak hmuh dingah Daniel le a hawi le Chendeih kawm chungah an luh hmasa a herh. Cu bantukin kan nih zong Pathian sunparnak a langh khawhnak ding ahcun Bawipa caah kan in pek ngam a hau. Harnak hi hrial khawhmi harnak le hrial khawh lomi harnak tiin phunhnih a um. Asinain Pathian riantuan ruangah harnak tonmi cu Bawipa nih a duhmi a si. India ram Orisa State i Khrihfa hrem lio ah khan Hindi kan si ti hna sehlaw an luat ko lai. Asiloah an cal ah a senmi te i thuh hna sehlaw an luat ko lai. Asinain harnak kha an tawn ngam. Cu bantukin Ramthar riantuannak zong hi a si. Sihmanhsehlaw Pathian min in amah ram kaunak caah harbu tein rian kan tuanmi phen ah lunglawmhnak nganpi a um. Vanlamtahnak locun suiluchin zong hi a um kho lo. Cucaah Bawipa caah voi zeizatdah harnak kan tawn cio cang. Pathian min tein harnak hrial loin tonngam hi thluachuahnak a si. Cu bantukin Mission riantuan cu a har zongah a har lai ti theibu tein tuanmi rian a si. Phungdang in chim ahcun Pathian ruangah harnak tonngam hi a hmanmi rian cu a si.