CHRISTMAS SERMON 2023

 

John 1:10-13, 3:16

Minung hi kan sinak hrim ah Pathian bochan in a nungmi kan si. Cucaah kan i hngatchan bikmi cu Pathian a si ko. Cucaah minung nih a dam chungah a kawl bikmi zong Pathian a si. A ruang cu pathian tel loin minung nun hi a te nau tukmi le zeihmanh lo la si.

Asinain minung hi amah thilti khawhnak hmangin a sunpar i a lianngan tukmi ve. Zeicahtiah sermi thil vialte lak ah a cungnung cemmi a si. A fimnak le a thiamnak hmangin sermi thil hna cungah nawl a ngei kho. Seh thangzang (industrial) hmangin vawlei pin tiang a phan kho. Cucaah Pathian tel loin zei maw zat cu a nung kho ko. A hlim i a nuam can zong a um ko. Asinain zeitluk thilti khawhnak ngeih ko hmanh sehlaw a caan donghnak a ngeimi kan si.

Cucaah zeitluk mi lianngan le mifim hna zong ri khiahpiakmi caan a lonh kho lo. Cucaah minung fimthiamnak nih thihnak le vanduainak cungah nawl a ngei kho lo. Cucaah Solomon siangpahrang zong nih minung kan sunparnak cu hlimthla dawi bantuk a si a ti.

Cucaah minung nunnak hi cantawi te a si (Sam 90:10). Minmei bang in a zaam i a thian zaumi bantuk a si (Sam 102:3). Job nih cun pangpar he a tahchun i a chitkhatte ah a hungpar i a ziamzau a ti. Alexander the Greek kha mi lianngan tuk a si. Asinain vanchiat ah ruah lo pi in a kit nih a tlaih i kum 30 hrawng a si ah a rak  thi. A thih hlan deuh ah bia pakhat an hal ti a si. An halmi cu na thih tik ah zeitin tuamhlawm le zohkhenh na duh an ti. A duh ning cu, “ka ruakkung thate in nan rak ser lai. Cun Doctor pawl nih ka ruakkung cu an rak zawnh lai i thlamual lei ahcun an rak ka kalpi lai. Thlamual an ka kalpi lio ah ruakkung chungin a lengah ka kut kha an rak langhter lai. Cun thlanmual pongkam vialte ah kan ngeihmi suingun chawnvavialte nan rak hlawt dih hna lai” a ti hna ti a si.

A sullam cu, Doctor pawl nih zawnh a duhmi cu minung damter khotu an um lo tinak a si. Cun ruakkung chungin lengah a kut langhter a duhmi cu kan thih tikah zeihmanh kan i ken khawhmi a um lo ti a chim duhnak a si i cucaah a ngeihmi sui le ngun hna thlan pong ah nan rak hlawt dih hna lai a tinak kha a si. Cucaah minung nih amah nakin thilti kho deuh hi a kawl zungzal.

Eden dum tuanbia kan zohthan tikah Pathian nih Eden dum chung ah aa dawhmi thingkung le rawl ca i a thami thingkung phunphun a khohter hna. Cun dum laifangah cun nunnak thingkung, a tha le tha hngalh khawhnak thingkung zong a khohter. Jehovah Pathian nih Adam cu aa thawh i “dum chung i a ummi thingkung vialte i an thei cu na ei dih khawh ko hna. Asinain a tha le tha lo hngalh khawhnak pe khotu thingkung tlai hi cu na ei lai lo a ti (Genesis 2:9-16). Cun Jehovah Pathian nih “thingthei hi nan ei lai lo, a tongh zong nan tawng lai lo a ti hna”.

Mah bia hi mi thiamsang hna nih hrilhfiahnak an tuah cio. Cheukhat nih “Eden dum cu kan vawlei pi le a chung i a ummi sermi thil vialte langhternak le hmuhternak zong a si chih ko. Cu bantukin dum laifang i nunnak thingkung zong hi vawlei ah sertu Pathian umpinak a si ko. Cucaah minung nih vawlei kan nun chung ah hi thil hi kan tuah ah maw that, kan tuah lo ah maw that ti kha sertu Pathian kan hla zungzal ding a si” a timi zong ah um.

Sihmanh sehlaw Adam le Evi nih hin rul nih a tukforh lio hna ah Bawipa sin ah hi thil hi kan tuah ah maw a that, tuah lo ah maw a that ti an hal ti lo. An ruahnak men le an duh thimnak men in an ei cang. Cucu Pathian duh lo taktakmi tuah a si. Pathian nawlngaih lo a si. Nawlngaih lo cu sual a si.  Cu ruangah Eden dum in thawl an rak si.

Asinain a lungthin kil ne in cun Pathian cu a philh lo. An nun nih Pathian cu a hlam zungzal. Asinain Pathian hmai ah misual dirhmun a si caah a hmu taktak kho ti lo. Cucaah Adam ci thlah minung vialte nih hi hi a si theu lai an timi paoh kha an rak biak. Cun Pathian caan ah zuklem an tuah i an biak. Cucu minung nih Pathian a kawlnak a si.  Cu bantuk tuahsernak cu miphun kip nih an ngei. A thangcho lomi miphun zong nih an ngei i a thangcho cangmi zong nih an ngei. Cu nih a langhter mi cu miphun kip nih Pathian cu an kawl ko ti hi a si.

Chin miphun zong kha himnak le zalawnnak duh ah hlan ah lung le thing, fing le tlang, sermi saram phunphun Pathian caan ah an rak biak ve ko. Cucu Pathian kan kawlnak phunkhat a si ve ko. Khuazing le Pathian min zong kan rak ngei ve ko. Cucu miphun kip nih kan i chuahpimi, Pathian nih a rak kan ser chihmi lungput a si ko. Asinain Pathian taktak cu kan rak hngalh kho lo.  

Cu bantukin Jehovah Pathian zong nih Evi le Adam kha a rak kawl hna. Khuaika ah dah nan um a ti hna. Cu leng ah cahlun chan ah Pathian phungnak kha kan hmuh lengmang. A caan ah profet hna sinah aw in a phung. A caan ah khuaruahhar tuahsernak in aa phung, a caan ah dam in aa phung, ralteinak in aa phung. Mithiang Paul le bang nihcun “sermi thil vialte hna hi Pathian phunnak a si” a ti. Sihmanhsehlaw sual dihhmun le sinak he cun ton khawh a rak si ti lo. Minung kan sinak chung i Pathian hmai ah thiang lo kan sinak kha thianter awk ah vawlei ah zeihmah a um ti lo. Vawlei thil nih a thianter kho ti lo. 

Asinain minung cu Pathian hmai ah mi sual si ko hmanh usilaw, zaangfahnak le a velngeihnak in a sermi minung cu a thinlung chungah aum zungzal. “Dong loin kan zohkhenh zungzal ko hna” (Jeramiah 31:3).  Cucaah Pathian cu Jesuh Khrih in vawlei ah mi vialte hmuh khawh dingin a rak phung. John cakuat bia cu minung ah a cang a ti. John 1:13 ahcun “Pathian fa ah a caan cu minung phung ningin a si lo, vawalei cung i hrinsor ningin a si lo, Pathian hrimhrim kha an pa cu a si” a ti. A dinnak le felnak in a thawl cangmi minung cu tlanhthan dingah taksa pum in vawlei ah a ra.  Vancungmi hna nih kulh in sunparnak he thu ko hmanhsehlaw Sehtan nih hlen in vawlei ah harnak a tawngmi hna khamh dingin a ra. Cucaah John nih cun “Pathian nih vawlei hi a dawt caah a fapa ngeihchun a pek; Cucaah Amah a zummi vialte cu an thi lai lo, zungzal nunnak an ngei lai John 3:16) a ti.

Paul nih Filipi khua ca a kuatnak hna ah “Pathian sinak kha a ngeih zungzalmi a si ko nain hramhram in Pathian tluk si awkah a rel lo. Amah lungtho tein cu vialte cu a hlawt dih i sal sinak tu kha aa lak; Minung bantuk ah a cang minung mui in a lang” a ti. Cu kong cu, Mtt. 1:23 nihcun “Immanuel” Pathian kan sinah a um a ti. Sehtan riantuannak ruangah ralnak le remlonak in a khatmi “vawlei ah remnak leng ko seh, a dawtmi hna umnak vawlei ah daihnak um ko seh” an ti.

Pathian sining hi minung nih hngalh dih khawh a si lo. Pathian nih minung sin phuan duh zat lawng kha kan hngalhmi a si ko. Minung theihthiamnak zat aa sersiam kha a si ko. Cheukhat nih an pom khawh zat le an hngalh khawh zat tiang lawngin Pathian kha an kawl tawn. Cu ruangah an hmu lo. An hmuh lo caah Pathian a um lo an ti. Bawi Jesuh chan zongah Faracy le Sadusi hna kha an si. Mesiah na si kha kan hngalh khawhnak hnga chinchiahnak kan pe tuah an ti. Asinain Jesuh nih a duh lo. A ruang cu anmah hngalh khawh zat le chinchiah khawh zat lawng nih khan Pathian sinak a tling lo. Pathian cu minung hngalh khawh zat pinlei sining a ngeimi a si.

Cun minung nih aa fimnak in theihhngalh khawh zat cu a um ko. Asinain Bawi Jesuh Khrih zumhnak cu Pathian phuannak ah a hngatmi a si caah minung theihhngalh cu zumhtlak a si a ti. Zumhtlak a simi cu vawlei ah a um lo. Vawlei cung thil vialte cu a hmun lo, a rawk than kho dihmi a si. Cucaah kan zumhnak zumhtlak a si kho dingah Jesuh kha pek kan si. Jesuh in Pathian kha kan sinah a rak i phuang. Khrihfa zumhnak kan timi hi minung ah a hngatmi a si lo. Pathian phuannak nih aa kenter chihmi a si deuh. Hika zawn hi zumh lotu nih an theihthiam tawn lo. Minung nih Pathian theihnak hram cu minung ti minung a sitertu le a nuntertu Thlarau hi a si. Cucu Pathian sin a rami a si. Thlarau nih kan thinlung innka hung in minung theih le hngalh kho lo kha theihhngalh khawhnak a kan pek. “Vawlei a ser hramthawk te khan, Pathian nih cun hmuh khawh a si lomi a sining, zungzal hmunmi a thawnnak le a Pathian sinak kha Jesuh in fiangte in a langhter ko. Cucaah i silhnalh khawhnak zeihmanh an ngei lo” (Rom 1:20) a ti. Martine Luther zong nih “minung khuaruah khawhnak (reason) cu san tlaimi cu a si ko nain Pathian kong ah biachahnak tuahtu dingah cun hman lo ding a si a ti. Pathian a kan theihtertu taktak cu minung khuaruahnak pinlei ah a um a ti.

Cucaah minung nih Pathian kan zumh, kan hngalh kan timi cu Amah Pathian nih hngalhter a kan duhmi zattu kha kan theihmi le hngalhmi cu a si ko. Cucaah kanmah demon ning siloin Pathian cu Jesuh in tangdor tein a ra. Mithiang Paul nih Filipi cakuatnak ah “Mi toi ah a dor i nawlngeihnak lam kha thih tiangin a zul” a ti. Cucu Pathian nih a kan kawlnak le a kan pehtlaihnak cu a si.

Philip Brook nih cun Bawi Jesuh kong ah hitin a chim. “Khuate chuah, lehtama chung chuah, Ca a cawng lomi, cozah rian a tuan bal lomi, chungkhar a ngei lomi, a umnak khua in meng 200 leng khual a tlawng bal lomi, Amah cawisannak certificate pakhat hmanh a ngei lomi a si. Cucaah vawlei ah Pathian fapa sinak ti lo cun hmaihngalpi ding pakhat hmanh a ngei lo a ti. Cucaah Bawi Jesuh nih vawlei ah a riantuannak kha a fimthimnak hmangin a si lo, Amah thilti khawh thawnnak in a si lo, Pathian fa sinak in a si.  Cu ruangah Pathian nih vawlei hi a dawt caah a fapa ngeihchun a pek tiah (John 3:16) ah kan hmuh.

Cucaah kan nih zumtu caah cun Khrih i a fa sinak lawng hi vawlei ahkan nunpimi le kan hmaihngal pimi cu a si.  Minung hi nifatin kan nunnak ah kan langhter duh khunmi cu kan hmaihngalpi bikmi thil kha a si ko.  E.g. Facebook te hna zongah kan hmaihngalpi bikmi kha kan langhter bikmi a si. Cu hawi sin chuah langhnak ah kan thil thuam kha kan duh bikmi le kan hmaihngalpi bikmi kan i hruk tawn. Kan inn cio zongah kan hmaihngalpi bikmi kha mi lengkai hmuh khawh dingin kan chiah tawn.  

Cu bantukin zumtu nih cun Pathian a kan pekmi Jesuh Khrih kha kan hmaihngalpi dingmi cu a si. Nifatin kan nun ah kan cung i a thatnak le a dawtnak kan hmaihgalpi dingmi cu a si. Zeicahtiah (1Cor 1:30) ah “Sihmanhsehlaw Pathian nih cun kan nih cu Khrih Jesuh he a kan pehtlaihter cang i Pathian nih Khrih cu kan nih fimnak caah a ser cang. Amah thawng cun kan nih cu Pathian he kan i rem i Pathian mithiang ah kan cang i a luatmi kan si. Cucaah cu Cathiang nih, porhlawt a duhmi cu Bawipa nih a tuahmi kha i porhlawtpi ko hna she” a ti.