PETER NIH JESUH HI ZEI RUANGAH DAH A HLAWT?.

Mtt. 26:69-75

A bikin thawhthan caan ah hin Bawi Jesuh nih Gesmany dum ah thla a camnak kong le an tlaihnak kong le zultu hna nih an zaamtaknak kong hna hi chim cio bikmi hna cu an si.

 Tutan ah kei ka chim duh vemi cu Bawi Jesuh an tlaih lio i zultu hna nih an zaamtaknak kong hi a si i cu lakah Peter nih hin zei rungah ah Bawi Jesuh hi a zaamtak ve tinak kong in thazaang lati hna usi ti ka duh. Bawi Jesuh nih an ka tlaih lai i nan ka zaamtak dih te lai ti kong hi a zultu pawl a rak chimh lio hna ah Peter nih kei cu kan zaamtak lai lo a rak ti (Mtt. 26:33). Asiah zei ruangah dah a zaamtak kun. Zei ruang mibu lakah sinum nu pakhat nih hi pa zong hi a zultu a si ve a rak ti lioah Peter nih mah pa cu ka thei lo a ti. Peter nih hin Bawi Jesuh hi kum thum chung a zulhmi a si i a thei lo taktak maw timi biahalnak  a um kho.

Bawi Jesuh an tlaih lio h khan mibu an tamtuk caah a buai sual lai ti an phang. Cucaah zanah a bia an ceih. Bawi Jesuh bia an ceih zan ah a zultu pawl nih an tliktak. Cu hna lakah Judah nih a zamtak hmasa. Cu hnu cun, a zultu dang vialte nih an zaamtak ve. A hnu bik i a zaamtakmi cu Peter a si. Peter nih a zaamtak lio ahcun Jesuh zultu a sinak a theitu minung pathum an um. Cu hna cu Pakhatnak ah sinum nu a si. Pahninh ah sinum dang pakhat a si i, pathumnak ah cu hmun i a ummi an pizapi tein an si. Cu lawng siloin Bible nih, Peter nih Jesuh a zaamtaknak hmun zong a lakter. Cu hmun hna cu, Voikhatnak ah Kaifas inn hmai ah a si i, voihninhnak ah kaifas innhmai kutka ah a si. A voithumnak cu Kaifas kutka leng ah a si. Mah a voithumnak hmun a phanh ah Ar a khuang tiin Bible nih cun a langhter.

Cu lawng siloin Bible nih Peter nih Jesuh a hlawtnak biafang hi pathum in a chim. Cu hna cu, Pakhatnak ah aa pheh: “na chimmi hi zei a si ti ka thei lo a ti. Pahninhnak ah chitserh in a chim. (He begain to curse and swear). Pathumnak ah chiatser in ka chim”. “Biahman lo ka chim ahcun Bawipa nih dan ka tat she” a ti.  Mtt. 5:33-37 ah van zoh in chiatserh in bia kam hlah u a ti. Cucaah Peter nih Bawi Jesuh nih a chimmi bia zulh loin bia a chim sual.

Asiah Zei ruangah Peter nih Jesuh hi a hlawt hna?. Peter nih Bawi Jesuh a hawtnak hi a ruang pathum in chim khawh a si. Pakhatnak ah lam hla in a zulh. Bawi Jesuh bia an halnak hmun tiang ah zul ti lo. Kaifas innhmai tiang lawng a zulh ngam. Cuka hmun in cun Bawi Jesuh he an umti lo caah a duhmi bia paoh kha, a ka thei lo aipat tiah a chim ngam cang. Pahninhnak ah mittalo pawl mei phu a to ve. Mi thalo pawl meiphun a to ve hnu cun, cu hna an duhning in biachim cu a haumi a si cang.  Cucu minung kan sining a si. Mi thalo mi hna an thil ti khawhnak a hrawm ve hnu ahcun a caah bia hman chim cu a harh ngai cang lai. Pathumnak ah Peter nih Bawi Jesuh a rallchanmi hna kha a hrial in hrial hna loin an lak ah khua a sa ve. Bible nih cun “mi thalo mi hna khuakhannak ah a tellomi cu lunglawmmi nan si” a ti “Sam 1:1-2). Sihmanhsehlaw Peter cu mi thalo mi hna lak ah a um caah a hnu ah ngeihchihnak le tahnak a cungah a phan.

Peter nih Jesuh hi a thei lo taktak maw?.

Mtt. 16:16 ahcun zultu pawl kha Bawi Jesuh nih ho ka si tiah a hal hna i Peter nih  “nang cu a nungmi pathian fapa messiah na si” tiah a ti. Cucaah Jesuh zong nih Mtt 16:16 ah “nang cu lungtum peter na si. Na chugnah ka khrihfabu ka bunh. Thihnak hmanh nih a tei lai lo” a ti. Cucaah Peter nih BawiJesuh hi a rak theih bal ko ti cu a fing. Mtt. 16:24 ah Bawi Jesuh nih “Aho hmanh keimah a ka zultu cu availamtahnak  kha nan ka zulh lai” a ti. Mah bia zong kha peter nih a theih ko. Asinain Jesuh nih  a chim duhmi amah pumpak hrim kha vailamtah cungah a thi te lai ti a  ruat lo. Cucaah Peter nih Bawi Jesuh cu a rak hngalh ko nain Jesuh nih hi vawlei ah a rat chanmi le a riantuannak sullam taktak kha a thei lo hrim hrim tinak a si.Cun Bawi Jesuh nih a zultu hna kha “Jeruslem ah ka kal lai i upa hna le thlangbawi ngan upa pawl hna le phungbia cawnpiaktu saya hna nih harnak tampi an ka pek lai. An ka thah lai i ni thum ni ah nunter than ka si lai tiah fingte in a chim hna” (Mtt. 1622). Cu lioah “Peter nih a dang deuh ah khin a hei i kalpi i a mawhchiat, Bawipa hi thil cu Pathian nih na chungah tlunter sawh hlah she a ti. Cu tikah Jeuh nih Peter cu “Sehtan ka sin ah um hlah, na ruahnak hi Pathian ruahnak si loin minung ruahnak a si caah ka caah donkhantu na si”  a ti.

 Cucaah Peter nih hin Bawi Jesuh hi Mesiah Pathian fapa na si, ti in a kaa in cun a chim ko nain Pathian fapa sinak, kan caah vailam ah a thih lainak le sual ngaihthiam kan si lainak hi cu a thei lo. Hiti ningpi in kum thum chung Bawi Jesuh pawngah helhum in a riantuan bomtu a rak si ko. Peter nih Bawi Jesuh a theih taktak cu a thawhthan hnu lawngah a si. Zeicahtiah Bawi Jesuh nih a rak chimchung cang. Mtt. 26:32 ah “Sihmanhsehlaw nunterthan ka si tikah nan hmaiah Galilee ah ka rak kal chung lai” a ti. Bawi Jesuh nih a thawhthan hnu ah kaltakmi a zultu pawl kha a kawhthan hna. Cun Peter zong kha na ka daw taktak maw tiah voithum tiang a hal (John 21:119). Cu a zultu pawl cu Galilee thlang ah an kai i Bawi Jesuh nih a rak chim cia bangin an hmuh. Cuticun an biak (Mtt. 28:17)  cu hnu lawngah Peter nih hin Bawi Jesuh hi fiangte in a hngalh.

Cucaah Peter nih hin Bawi Jesuh a hawt lioah hin a rak theih lo hrimhrim mi a si. Minung sinak in cun a theih ko nain Bawi Jesuh Khrih Pathian fapa sinak le hi vawlei a rat chan kha a hngalh lo caah Jesuh nih a thih lainak kong a chim tikah ah a thei kho ti lo. Cucaah an tlaih lioah Peter caah zaamtaknak cu a fawimi a si. Cucaah lungdong in ngatlaihnak (a rianthing) ah kirthan zong kha a fawimi a si ko (John 21:3). Asinain Jesuh thih thawhthan hnu cun a sinak kha Peter nih fiang tein a hngalh. Bawi Jesuh thihnak in a thothan i van a kai hnu, thiangthlarau a pek hna hnu lebang ahcun Peter cu Petecost ni ah mi 5000 hmaiah bia a chim cang. Mizaw hna zong a damter cang hna. Thiangtlarau nih a umpi i khuaruahharnak phunphun  a khawh cang.